SERVE Seidauk Atribui Sertifikadu Investidór Ba Hong Long

DILI, (TATOLI) - Diretór Ezekutivu SERVE, Florêncio Sanches  informa katak, Kompañia Hong Long Fisheries husi Xina ne’ebé oras ne’e governu suspende nia atividade iha portu Karavela SERVE seidauk fó sertifikadu investidór tanba hein desizaun Konsellu Ministru.

“Sertifikadu investidór seidauk fó sai tanba kompañia tenke kumpre buat balun tanba investimentu kompañia nia ne’e boot liu millaun U$20, nune’e parte kompetente tuur hamutuk hodi lori ba Konsellu Ministru, infelizmente seidauk hasai desizaun,” Florêncio hatete iha Matadouru, ohin.

Ba atividade peska ne’ebé kompañia ne’e hala’o iha Kosta Súl hetan ona legalidade husi Servisu Rejistu no Verifikasaun Emprezariál (SERVE) tanba kumpre ona Lei Sosiedade Komersiál, Kódigu Rejistu Komersiál no Lei SERVE rasik, maibé seidauk hetan sertifikadu investidór.

Sertifikadu investidór seidauk fó, tanba kompañia tenke kumpre regras ne’ebé sei hasai bazeia ba parte kompetente tuur hamutuk iha Konsellu Ministru.

“Sertifikadu investidór ida ne’e monu ba nia, iha lei hatete sé nia simu sertifikadu investidór ida ne’e nia atu hetan benefísiu balun husi Estadu. Benefísiu mak nia sei hetan asesu ba rai rohan, agora nia halo tiha investimentu como sertifikadu seidauk tun, ba SERVE nia haree la buat ida tanba nia selu taxa, sé ita fó sertifikadu entaun nia sei laselu taxa,” Florêncio esplika.

“Sertifikadu mak seidauk bele tun maibé parser husi ministériu relevante inklui SERVE ami fó tiha ona iha tinan kotuk atu nune’e bele lori ida ne’e ba Konsellu Ministru, hein katak Governu foun mai bele fasilita ida ne’e, prosesa ida ne’e para haree nia sertifikadu sira ne’e”.

Hatán kona-ba infrasaun ne’ebé kompañia komete hodi hakail ikan protejidu, Florêncio Sanches dehan,  empreza hetan sertidaun sertifikadu bá hakail ikan no ikan ida kompañia kail ne’e mak sai kestaun, kulpa ne’e tenke ba duni kompañia refere, entaun  Governu nu’udar regulador tenke foti medida hasoru nia.

“Kulpa ne’ebé halo SERVE rasik laiha kbiit atu tuir bá tasi ne’ebá para bandu, Trade Invest rasik mós labele bá, MAP mós hanesan, tanba nia halo krime ona, nia viola lei ida proteje ba ikan mas nia laiha krime ida hasoru nu’udar sosiedade, ne’e laiha. Nia kriminaliza mak monu iha ikan ne’ebé nia kail”.

Jornalista: Maria Auxiliadora | Editór: Manuel Pinto

Foto: Diretór Ezekutivu SERVE, Florêncio Sanches.