quinta-feira, 23 de novembro de 2017

Karta Xanana Responde Ona Espekulasaun Iha TL

DILI - Karta Xanana neebe haruka ba Prezidente Republika Francisco Guterres Lú Olo, responde ona espekulasaun neebe durante nee lao iha sosiedade nia leet, hodi solusiona problema rai laran.

Lia fuan hirak nee hatoo husi Observador Politika husi Universidade Timor Lorosae (UNTL) Camilo Ximenes ba STL iha nia knar fatin Caicoli Dili Kinta, (23/11/2017). Na dehan, situasaun hanesan nee signifika atu koko Prezidente Republika atu koloka nia an ba iha fatin lolos.

“Tuir ami nia haree katak karta Xanana no tuir mai konfrensia inprensa neebe halo lider Xanana, Taur Tatan Ruak no Naimori Bucar hasoru malu iha Singapura foin lais nee responde hotu ona espekulasaun neebe durante nee iha Timor. Maibe Prezidente maka sei hili dalan eleisaun antisipada ou fo fiar ba partidu manan segundu mais votadu maibe sei iha konsekuensia moos,”nia kualia.

Tanba nee tempu ona atu Prezidente uja nia kompetensia neebe garante iha konstituisaun laran. Relasiona ho politika nee katak Parlamentu Nasional husi parte opozisaun rejeita ba Orsamentu Ratifikativu (OR) neebe VII Governu hatoo ba PN.

Abono Ram Cabean reprezentante mate restu husi 12 de Novembru dehan iha karta Xanana neebe hatoo ba PR Francisco Guterres Lú Olo nee konfidensial. Tanba nee maka kontudu husi karta Xanana nia PR labele anunsia ba publiku konaba kestaun refere. Maibe iha nafatin esperansa katak sei iha solusaun diak husi Prezidente Republika. 

Justinho Manuel | Suara Timor Lorosae

Sem comentários: