Komemora 28 Novembru, governu gasta US$400.000

Ministru Administrasaun Estatal (MAE), nu’udar mós Prezidente Komisaun Organizadora 28 Novembru 2017, Valentim Ximenes, informa, Governu gasta Orsamentu Jeral Estadu (OJE) $400.000 hodi komemora 28 Novembru iha Munisípiu Covalima.

“Mais ou menus serca de $400.000 maka ita uza ba komemorasaun 28 Novembru iha Suai-Covalima no restu hela ba Munisípiu seluk, entre Munisípiu seluk ne’e Díli maka númeru boot liu, tanba Díli maka kapital nasaun,” Ministru MAE ba jornalista sira hafoin remata informa preparasaun komemorasaun aniversariu proklamasaun independensia 28 Novembru iha Suai-Covalima no Munisípiu sira ba Prezidente Repúblika (PR), Francisco Guterres ‘Lu-Olo’ iha Palasiu Prezidensial, Bairo Píte, Díli, Segunda (20-11-17).

Nia esplika, MAE fahe osan sira ne’e tuir nesesidade Munisípiu ida-idak nian, haree ema barak ka oitoan, maibé tanba agora konsentra iha Suai-Covalima, entaun osan barak liu maka iha Suai-Covalima.


“Orsamentu ba komemorasaun 28 Novembru ne’e mai husi OJE por volta de $600.000 (seis e centos mil), osan refere la’os ba de’it iha Suai-Covalima, maibé ba Munisípiu sira hotu,”dehan Valentim Ximenes.

Nia akresenta katak, iha loron 24 ba leten loke feira iha Suai-Covalima hodi promove produtu lokal no promove kapasidade Timor oan nian, atu oinsa bele dezenvolve produtu lokal, hanesan gastronomia ka kualker produtu ne’ebé maka Timor oan iha. Tanba ne’e, biban ida Timor-Leste bele dezenvolve-an.

“Atividades antes 28 Novembru maka hanesan primeiru atividade desportivas ninian hanesan jogu futebol, basketbol no volibol halo kedas iha meiados de Outubro to’o agora, atividade sira ne’ebé antes tama ba 28 Novembru maka desportivu tradisionais hanesan halai taru kuda, kareta no motor,”haktuir Ministru MAE ne’e.

Valentim Ximenes, afirma, serimonia komemorasaun 28 Novembru iha Suai-Covalima sei ba partisipa husi PR, Primeiru Ministru no membru Governu sira seluk, membru Governu balun enviadu ba Munisípiu hodi sai inspetor jeral ba isar bandeira no lee diskursu PR nian.

“Ita-nia konvidadu entranjeiru ne’e iha típu 2, ida rezidenti no la’os  rezidente iha Timor-Leste, to’o ohin (horibainrua-red) ita iha nasaun 7 maka pozitivu atu partisipa hanesan Portugal, Kuwait, Indonesia, Malaysia, Singapura, Australia no Nova Zelandia, ami seidauk hatene Xefi Estadu no Governu husi nasaun 7 ne’e hira maka atu mai, klaru que na verdade nasaun 7 disponivel no fó ona resposta serta,”hatutan Prezidente Komisaun Organizadora komemorasaun 28 Novembru ne’e.

Entretantu preparasaun komemorasaun 28 Novembru iha Suai-Covalima iha ona faze konkluzaun ba servisu tomak ne’ebé halo kedas iha fulan Outubru to’o agora, MAE konfiante katak to’o 28 Novembru buat hotu sei la’o ho diak.

Preparasaun faze final

Preparasaun ba serimonia proklamasaun independensia, 28 Novembru 2017, ne’ebe konsentra iha Munisipiu Covaliman, tama ona iha faze final.

“Preparasaun fizikus no serimonial nian iha terenu tama ona iha faze final,” informa Ministru Estatal,  Valentim Ximenes ba jornalista sira iha Palacio Governo,  Segunda (20/11/2017).

Nia hateten, serimonia 28 Novembru, sei komemora iha munsipiu hotu-hotu, tanba ne’e, membru Governu ida-idak inviadu atu ba sai espetor jeral ba isar bandeira, hodi le’e diskursu Prezidente Republika nian iha munisipiu hotu-hotu. Vês / Ety

GMN - Grupo Média Nacional