Partidu sia timoroan nian harii bloku ne'ebé bele aprezenta iha eleisaun tuirmai

Partidu ki'ik sira timoroan nian ne'ebé entre sira hetan votu rihun 60 resin iha eleisaun loron 22 Jullu nian kria ona, iha loron-kinta ne'e, bloku ida ne'ebé hakarak sai hanesan lian iha momentu polítiku atual no ne'ebé bele aprezenta iha eleisaun sira tuirmai ne'e. 

Fórum Demokrátiku Nasional (FDN) halibur reprezentante sira hosi Partidu Unidade no Dezenvolvimentu Demokrátiku (PUDD), Uniaun Demokrátika Timoroan (UDT), Frente Mudansa (FM), Bloku hosi Unidade Popular (BUP), Partidu Sosialista Timor nian (PST), Partidu Sosial Demokrata (PSD), Partidu Republikanu (PR), Partidu Dezenvolvimentu Nasional (PDN) ho Partidu Demokrata Kristaun (PDC).

FDN harii iha momentu ida hosi situasaun polítika ne'ebé susar iha Timor-Leste, hafoin opozisaun maioritáriu xumba tiha programa Governu nian no bainhira iha rejeisaun ba dala rua sei hamonu ezekutivu.

Bainhira akontese, xefe Estadu tenki hili entre hetan solusaun governativu ida iha senáriu atual hosi parlamentu ka avansa ba eleisaun antesipadu sira.

Iha konferénsia imprensa hamutuk entre líder sira hosi partidu sia, sira le ona komunikadu ida hodi apela ba xefe Estadu, Francisco Guterres Lu-Olo, hodi konsege esforsu tomak hodi "hetan solusaun ida governasaun nian".

Sira defende katak solusaun ne'e tenki respeita Konstituisaun no "sei kontribui hodi hametin funsionamentu hosi Governu ida estável ne'ebé sei garanti dezenvolvimentu sosioekonómiku nasaun nian, tau forsa polítika sira hotu iha igualdade".

Testu ne'e husu mós respeitu maka'as hosi ema tomak ba xefe Estadu ne'ebé sira husu "hodi hametin neutralidade no apartidarizmu hosi Forsa sira Defeza Timor-Leste (F-FDTL) nian hasoru situasaun atual hosi governasaun".

Tuir esplika hosi responsável sira bloku nian, objetivu maka partidu ida-idak fó koñese agora ba sira nia militante no apoiante sira fórum foun nune'e, tuir sira nia esplikasaun iha konferénsia imprensa, katak maioria defende atu FDN aprezenta hanesan koligasaun pré-eleitoral.

Hosi grupu halo parte partidu daneen, dahitu no daualuk ne'ebé hetan liu votu no nune'e, iha total, forsa polítika sia hetan votu 60.130, nune'e sei tama - bainhira ezisti koligasaun - hanesan forsa polítika datoluk, halakon Partidu Libertasaun Popular (PLP) ne'ebé konsege hili ona deputadu na'in ualu ho nia votu hamutuk 60.098.

José Luis Guterres, líder hosi Frente Mudansa (FM), no eis-ministru Negósiu Estranjeiru, hatete ona iha konferénsia imprensa hamutuk katak partidu sira senti "responsabilidade ba iha eleitoradu ne'ebé vota ona" no mantén "respeitu maka'as, admirasaun no domin ba povu Timor-Leste".

La deklara preferénsia ba senáriu solusaun ida hosi krizi polítika, José Luis Guterres hatete ona katak FDN bele aprezenta ba eventual eleisaun antesipadu sira.

João Gonçalves, hosi PSD, hatete ona katak tenki kestiona aspetu sira hanesan kustu hosi eleisaun sira, kapasidade hosi Governu jestaun ida hodi aprova orsamentu eleitoral ida no "kestiona katak ne'e sei hanesan interese nasional ka hosi povu".

"Karik ne'e sei lori estabilidade sosial no ekonómiku ba nasaun? Ita tenki kestiona. Hanesan kestaun sira ne'ebé señór Prezidente tenki hanoin, hatene katak iha solusaun konstitusional sira seluk ne'ebé bele hili mós", nia afirma.

"Ami husu atu desizaun ruma ne'ebé maka hili sei hanesan konstitusional no hanesan hosi interese nasional no interese povu nian", nia hatete.

Pozisaun ne'e hato'o mós hosi Leandro Isaac (UDT) ne'ebé hatete katak partidu sira hatudu "preokupasaun hosi nia eleitoradu" no defeza hosi interese nasional maka motiva ona hodi foti "pozisaun públika ida ne'e".

SAPO TL ho Lusa