domingo, 31 de dezembro de 2017

Durante 2017 AIFAESA Taka Estabelesimentu Ualu

DILI, (TATOLI) – Durante 2017, Autoridade Inspesaun no Fiskalizasaun  ba Atividade Ekonómika no Sanitária (AIFAESA) taka estabelesimentu ualu tanba kontamina substásia sira ne’ebé ladi’ak no kondisaun ijiene ne’ebé laseguru.

Xefe Divizaun Operasaun, AIFAESA, Alfonsius Costa Akoyt, hatete estabelesimentu ne’e taka temporáriu mak produsaun ice cream rua ne’ebé na’in husi Xina, indústria tofu ida, tempe tolu, tahu ida no restaurante mie ayam ida.

“AIFAESA foti desizaun hodi ensera temporária estabelesimentu ne’e mak bainhira ami kolleta amostra, ami servisu hamutuk ho Laboratóriu Nasionál Saúde nian depois halo análiza no rezultadu sira-nia produsaun kontamina substánsia sira ladi’ak, bele borrax, formalin, ikus mai deside taka nomós seluk mak kondisaun ijiene ladi’ak tanba produsaun ice cream rua ne’e sira toba, han, haris-fatin mós iha ne’ebá, ekipamentu produsaun lakuidadu ho di’ak sira-nia tékniku lauza vestimentu atubele proteje kondisaun ijiene bainhira halo atividade produsaun”, katak Akoyt iha Matadouru, ohin.

Enkuantu husi estabelesimentu sira ne’e iha tolu ka haat mak konsege hadi’a ona produsaun no rua ka tolu mak kontinua fali ona hanesan indústria tahu no tempe tanba ekipa tun ba foti fali amostra hodi halo teste no produtu livre ona husi substánsia sira ladi’ak no kontinua fali ona atividade.

Alfonsius hatutan durante iha fevereiru-dezembru 2017 atividade  ne’ebé AIFAESA halo mak fiskaliza ona estabelesimentu hamutuk 1.195 ne’ebé kompostu husi munisípiu hamutuk 858 no Dili 337.

Totál produtu ne’ebé Aifaesa apreende (foti) hanesan hemun hamutuk 15.553, produtu alimentár hamuutk 17.275 no sigaru eletróniku 3.543.

Totál infrasaun hamutuk 502 tanba fa’an sasán liu prazu, halo atividade latuir lisensa, lisensa mate no laiha lisensa. Husi 500 resin ne’e iha 485 prosesu mak ba ona Gabinete Jurídiku AIFAESA nian hodi prosesa.

“Totál prosesu ne’ebé ami hatama iha 100 resin mak finaliza ona tanba ita bele haree husi valór koima ne’ebé sira selu. Prosesu 300 resin ne’e seidauk bele tanba prosesu ne’e balun envolve infrasaun iha munisípiu, entaun ami identifika infrasaun ne’e difisil tebes atu ami halo instrusaun ba prosesu ne’e”.

Jornalista: Maria Auxiliadora | Editora: Rita Almeida

Foto/Google.

Sem comentários: