UNTL Fó De’it Kail La’ós Ikan

DILI, (TATOLI) – Reitór Universidade Nasionál Timor Lorosa’e (UNTL), Francisco Miguel Martins, hateten UNTL fó de’it kail la’ós ikan ba graduadu sira tanba ne’e graduadu sira esforsu nafatin hodi hetan vitória.

“Ikan ne’ebé imi atu han iha refeisaun ida de’it. Maibé, kail ne’ebé UNTL fó hanesan bukae ida oinsá imi buka ikan rasik ho badinas liutan hodi hetan ikan barak liutan”, hatete reitór perante graduadu na’in 503.

Afirmasaun provérbiu ne’e reitór hato’o tan tuir nia, graduasaun ne’ebé halo ba graduadu sira nu’udar loron ikus ba graduadu sira ne’e iha UNTL.

Tuir prosedimentu formál, legál akadémiku ninian halo kumpleta hotu. Nune’e ho serimónia ne’e, UNTL entrega hikas fali ba inan-aman, enkaregadu edukasaun nian nomós ba komunidade.

Dalaruma rona liafuan sira: A luta continua, a vitória é certa. “Ohin imi-nia loron vitória, husi luta ne’ebé iha loron dahuluk kedas imi tama, sama ain iha UNTL, maibé vitória ida ne’e mós sei la buat hotu. Katak dezafiu foun no obstakúlu oi-oin sei mosu no imi sei hasoru, simples liu hanesan imi la hetan serbisu”, akresenta.

Reitór mós reforsa bainhira gradua dezafiu seluk mak oportunidade hodi hetan serbisu. Tan buka serbisu husi fatin ida ba fatin seluk, dalaruma ema bele taka odamatan no buat seluk tan.

“Lalika dezanima, foti oin hateke ba dook, hodi dalen Indonézia dehan: Kegagalan adalah keberhasilan yang tertunda eh portugéz katak falha é um sucesso adiado. Tanba ne’e luta nafatin”, enkoraja.

Miguel mós agradese ba inan-aman, família no parente graduadu sira tan fó fiar no tau konfiansa ba UNTL ho nia estrutura no dosente sira tomak atu haruka oan sira mai buka matenek iha instituisaun ida ne’e.

Ba graduadu sira, reitór universidade públika ne’e hateten graduadu sira ultrapasa ona obstakúlu sira hotu, susar oi-oin em termo de akadémiku no finanseira.

Katak tan osan la iha, hahan la iha, hela fatin mós la iha, iha Dili laran hela ho família ka parente sira.

“Em nome instituisaun UNTL ninian fó parabéns ba imi-nia susesu. Susesu boot ne’ebé imi hetan, tulun husi parte oi-oin; inan-aman, imi rasik, dosente, funsionáriu tékniku administrative no membru governu no komunidade tomak”, kongratula.

Reprezentante graduadu sira, Osménio Fernandez, iha nia intervensaun hateten graduasaun ne’e nu’udar loron ne’ebé hatudu katak remata ona primeiru siklu iha nível ensinu superiór nian, hanesan rezultadu ida ne’ebé lori tempu naruk, sakrifísiu ne’ebé todan.

Ba inan-aman sira, loron ne’e nu’udar loron ne’ebé sira hein hela hakarak asiste nu’udar rezultadu husi sira-nia kontribuisaun no suporta tomak. Ba dosente sira hotu, loron ne’e nu’udar dedikasaun tomak ne’ebé dedika hela ba graduadu sira.

Ba nasaun Repúblika Demokrátika Timor-Leste (RDTL), loron ne’e nu’udar loron istóriku ne’ebé UNTL hatudu ba mundu nia matan nu’udar fatin produz rekursu umanu sira hodi garante dezenvolvimentu ne’ebé sustentável no kontinuativu.

Nune’e mós UNTL hatudu responsabilidade morál hodi produz rekursu umanu sira ne’ebé kualidade no kompeténsia sai valór umanidade, nu’udar sientista, lider foun nasaun nian iha loron aban bainrua ne’ebé mós prontu kompete iha merkadu traballu nível nasionál, rejionál nomós internasionál.

“Ami hakarak agradese profundu ba Maromak, inan-aman no família sira hotu, magnifiku reitór UNTL, vise-reitór no pro-reitória, dekanu, dosente no estrutura tomak. Administrasaun jerál no administradór UNTL nian, espesiál ba dosente ba

sira-nia kontribuisaun, dedikasaun tomak”, agradese.

Ba graduadu, nia akresenta loron graduasaun ne’e nu’udar loron importante tan hakerek istória iha ida-idak nia moris no konsiente loron ne’e la’ós loron ikus husi sira-nia esforsu. Loron ne’e nu’udar inísiu husi esforsu no luta hodi hasoru problema seluk.

“Ho nune’e, ita la’ós de’it futuru maibé futuru ne’ebé prezente hodi rezolve problema ruma relasaun ho ita-nia koñesimentu no kompeténsia”, katak reprezentante graduadu husi Fakuldade Agrikultura ne’e.

Iha okaziaun ne’e, nia mós rekomenda ba UNTL, goza autonomia ne’ebé iha tuir estatuta hakarak hodi dezenvolve di’ak liutan atividade ensinu aprendijazen, peskiza no prátika sientífiku nomós atividade estra-kurikuler hodi bele tulun, eleva kualidade produsaun.

“Hodi nune’e la’ós produz de’it kualidade no kuantidade ne’ebé boot maibé kualidade profisionál hodi bele hetan absorvesaun iha merkadu traballu”, konklui Osménio Fernandez.

Entretantu graduasaun UNTL nian tinan ne’e haktuir ba konstituisaun RDTL, artigu 59o. Tuir lei baze Ministériu Edukasaun no Kultura (MEK), dekretu lei nú. 16/2010 dia 20 outubru kona-ba estatutu UNTL.

Despasu reitór UNTL nú. 100/UNTL/R/XI/2017 kona-ba promulgasaun formal sertifikasaun graduasaun UNTL hasai iha loron 8 novembru 2017.

Despasu MEK nú.76/GNE/MEK/XI/2017 autoriza lista graduasaun UNTL hodi konfere grau akadémiku ba estudante sira ne’ebé mak konklui estudu iha 2017 kursu sira ne’ebé autorizadu hasai iha loron 24 novembru 2017.

Enkuantu, tinan ne’e, UNT gradua finalista na’in 503; Fakuldade Agrikultura na’in 67, Fakuldade Edukasaun, Arte no Umanidade na’in 159, Fakuldade Siénsia Sosiál na’in 39, Fakuldade Ekonomia no Jestaun na’in 104, Fakuldade Enjeñária na’in 95, Fakuldade Direitu na’in neen no Fakuldade Medisina, Siénsia Saúde na’in 33.

Graduasaun finalista UNTL sira ba da-XVIII ohin fahe ba grupu rua; husi tuku 08h00-12h00 (Fakuldade Agrikultura, Fakuldade Edukasaun, Arte no Umanidade no Fakuldade Siénsia Sosiál).

Tuir mai, tuku 14h00-16h00 (Fakuldade Ekonomia no Jestaun, Fakuldade Enjeñária, Fakuldade Direitu no Fakuldade Medisina, Siénsia Saúde).

Jornalista: Rafy Belo | Editora: Rita Almeida

Imajen: Reitór Universidade Nasionál Timor Lorosa’e (UNTL), Francisco Miguel Martins. Foto: media UNTL