Kazal Portugueza rua halai husi justisa, Embaixada Portugal tenki responsabiliza

Parlamentu Nasionál (PN) ejize ba embaixada Portugal iha Timor-Leste atu responsabiliza hodi justifika loloos, kona-ba prosesu kázal Portugueza nain rua, Tiago Guerra ho nia espoza Chang Fong Fong ne’ebé halai sai ona husi Timor-Leste (TL) no oras ne’e iha ona sira-nia rai Portugal.

Antes ne’e kazal Portugues nain rua ne’e halai subar ba Australia ho Ró liu husi Munisipiu Manufahi, ne’ebé deskonfia embaixada Portugal mak fasilita pasaporte ba akuzadu nain rua ne’e hodi sai hosi Timor.

“Tenke halo lalais samada ba embaixador Portugal nian iha Timor-Leste, para bele halo esplikasaun kona-ba natureza hosi situasaun ne’e, governu mós tenke konsulta husi parte Australia nian kona-ba natureza husi kazu ne’e, bainhira sira (kázal) to’o iha Australia, tanba sidadaun nain rua ne’e akuzadu hela iha Timor-Leste  no antes ne’e desizaun mós sai tiha ona, ne’ebé sa’e de’it ró ba Australia,”deklara Fidelis Magalhães ba jornalista sira iha Parlamentu Nasionál, Kinta (30/11/2017).

Tuir reprezentante povu husi bankada Partidu Libertasaun Popular ne’e katak, natureza kázal Portugal nain rua (Tiago ho Chang ) ne’e hanesan matéria ka samada ida ba Timor-Leste atu bele tau atensaun máximu ba sistema informasaun hotu, inklui sistema imigrasaun, Justisa, PNTL no F-FDTL, atu labele akontese tan iha futuru.

“Ida ne’e hanesan samada atensaun ida ba ita, oinsa tau atensaun ba ita-nia sistema hanesan imigrasaun, servisu polísia nian, no sistema informsaun sira hotu, inklui haré fali ba ita-nia sistema justisa. Maibe ita mós keta haluha, tanba iha komentáriu barak iha liur kona-ba sistema justisa iha Timor, ne’ebé hasoru dezafius barak maibe tenke hasoru, tanba Portugal rasik apoiu sistema justisa Timor nian, inklui UNDP mós apoiu sistema Timor nian, maibe ita la’os atu uza oportunidade ne’e hodi insulta malu ho Portugal, iha meius sivízadus entre país ho país iha kanal diplomátiku, tanba ita nia parseria ne’e importante nafatin, nasaun nia nia relasaun sempre infrenta problemas, maibe ne’e depende ba nasaun sira nia kapasidade atu rezolve tiha problemas hodi hetan solusaun ba futuru,” dehan Fidelis.

Tuir Fidelis, ligasaun entre Timor ho Portugal diak tebes, maibe la signifika atu hanehan kestaun sira hanesan ne’e.

“Timor-Leste ho Portugal iha relasaun ne’ebé metin, maibe mós la’os atu nonook de’it tanba relasaun diak, tenke meius diplomátiku ne’ebé ita tenke implementa para halo komunikasaun ida ne’ebé loloos no diak hodi solusiona kazu ne’e, inklui haré mós ba kazu ne’e nia estatus iha futuru, liuliu iha sistema Portugal nia saída mak bele halo ba sidadaun nain rua ne’e,” esplika Fidelis.

Iha fatin hanesan, deputadu bankada FRETILIN, Aurelio Guterres mós husu ba Estadu Timor-Leste liu hosi orgaun kompetente atu bele servisu hamutuk ho Governu Portugal nian para bele lori fila akuzadu nain rua ne’e hodi halo julgamentu.

“Ita presija koordena ho embaixada Portugal iha Timor, Governu mós tenke bolu embaixador Portugal para bele justifika loloos, no buka dalan oinsa atu lori fila Tiago Guerra ho nia fen Chang Fong Fong mai tuir julgamentu,”dehan deputadu Aurelio.

Enkuantu, Tribunal Distrital Dili kondena kázal nain rua ne’e (Tiago Guerra ho Chang Fong Fong) ba prizaun efetiva tinan 8, no tenke selu indemnizasaun osan dólar 859 ba krime pekulatu.

Tribunal akuza arguidu nain rua nu’udar autor ba krime pekulatu no absolve ba krime brankeamentu kapital no falsifikasaun dokumentus.

Kázal Portugal ne’e, hetan kaptura iha Darwin Australia iha loron 9 fulan Novembru, bainhira halai ilegal husi Timor ho ró, no uza pasaporte Portugal nian.

Enkuantu, agora dadaun kázal nain rua ne’e transfere ona ba nasaun Portugal. Say

GMN – Grupo Media Nacional