Taur Matan Ruak, líder hosi
partidu datoluk timoroan nian, defende iha loron-tersa ne'e katak Timor-Leste
presiza solusaun lalais ida hosi Prezidente Repúblika ba difikuldade polítika
atual no di'ak liu iha desizaun "sala" ida duké laiha desizaun ruma.
"Ami nia pozisaun, ne'ebé
ami hato'o ba señór Prezidente maka ho baze iha situasaun di'ak liu foti
desizaun sala ida duké la foti desizaun ruma. Ami repete apoiu no respeitu ba
desizaun ruma hosi señór Prezidente", nai hatete iha Palásiu Prezidensial.
"Nu'udar porta-vós hosi
Aliansa Maioria Parlamentar (AMP) ha'u garante ona katak ami sei prontu hodi
rona desizaun ruma. Agora hein de'it ba señór Prezidente", nia afirma.
Taur Matan Ruak lidera ona
delegasaun hosi Partidu Libertasaun Popular (PLP) ne'ebé hasoru malu ho xefe
Estadu, Francisco Guterres Lu-Olo, iha Palásiu Prezidensial, iha Díli, ne'ebé
iha loron-tersa ne'e rona partidu sira ne'ebé iha fatin iha parlamentu.
Maski iha pergunta oioin
eis-prezidente lakohi klarifika kona-ba opsaun saida maka nia partidu hakarak,
hodi insisti katak importante maka iha desizaun lalais ida.
"Ha'u nia partidu hato'o
konfiansa iha señór Prezidente no nia maka desidi agora solusaun ne'ebé di'ak
ba nasaun no ami sei kumpri desizaun ne'ebé nia desidi", nia hatete.
"Di'ak liu foti desizaun
sala ida ka ladi'ak duké la desidi buat ida. Labele mantén nasaun iha situasaun
hanesan ne'e", nia insisti no hatete katak depois maka sei hato'o
esplikasaun kona-ba PLP sei iha ka la'e koligasaun pré-eleitoral ida bainhira
iha kazu ba eleisaun antesipadu.
SAPO TL ho Lusa
Sem comentários:
Enviar um comentário