quarta-feira, 24 de janeiro de 2018

Rezultadu Reuniaun Konsellu Estadu Sei Públika iha Jornal da República


DILI, (TATOLI) – Tuir lei Konsellu Estadu artigu 10 aliña 1 hateten rezultadu enkontru obrigatoriamente públika de’it iha Jornál Repúblika ba deliberasaun sira ne’ebé tomada ona (São obrigatoriamente publicadas no Jornal da República as deliberações tomadas).

Entretantu artigu 9 aliña 1 hateten Reuniaun Konsellu Estadu labele fó sai ba públiku (As reuniões do Conselho de Estado não são publicas) no Prezidente Repúblika maka bele fó sai rezultadu maibé la’ós obrigatóriu.

Reuniaun Konsellu Estadu ne’ebé prezide hosi Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, kuarta ne’e, taka ba públiku liu-liu ba mídia sira.

Enkontru altu nivel ne’e hala’o iha tuku 09.30 to’o 12.30 ho objetivu konsulta no rona membru Konsellu Estadu sira nia opiniaun molok Xefe Estadu foti desizaun hodi hakotu inserteja polítika ne’ebé la’o daudaun iha Nasaun ne’e.

Hafoin reuniaun ramata, membru sira hamutuk ho Prezidente Repúblika hala’o almosu konfratenizasaun iha salaun Palásiu Prezidénsia Repúblika.

Tuir observasaun Tatoli, líder nasionál sira liu-liu Primeiru Ministru, Marí Alkatiri no Eis Prezidente Repúblika, Taur Matan Ruak, amizade tebes maske durante ne’e sira iha diverjénsia polítika.

Konsellu Estadu nu’udar órgaun konsulta hosi Prezidente Repúblika, iha ne’ebé diretamente kria hosi Konstituisaun Repúblika Demokrátika Timor-Leste (RDTL) artigu 90 no 91.

Jornalista: Xisto Freitas | Editora: Rita Almeida

Imajen: Kaer liman malu entre Primeiru Ministru, Marí Alkatiri no Eis Prezidente Repúblika, Taur Matan Ruak, iha Palásiu Prezidente Nicolau Lobato, ohin, hafoin reuniaun Konsellu Estadu. Imajen Mídia Palásiu PR /@fernandes - 2018

Sem comentários: