Iha Konsensus, Governasaun Dura

DILI - Prezidente Ensinu Superior Timor Leste (ESTL) Augusto Conceição Soares dehan atu hakotu impase politika rai laran presiza partidu politiku sira halo konsensus governasaun ba malu no husu kosultasaun ba prezidente republika atu governu beele dura.

“Ami nudar ema akademiku nia sujestaun ba PM Mari Alkatiri maka nee tenki halo konsultasaun ho partidu opozisaun iha PN atu halo konsensu atu nunee governasaun beele dura to tinan lima,” dehan Augusto ba STL iha nia servisu fatin, Pantai Kelapa Dili, Tersa, (23/1/2018).

Tanba realidade husi parte pozisaun iha Parlamentu Nasional hatudu ona katak programa governu nia parte opozisaun rejeita, no orsamentu ratifikativu. Nunee mos mosaun sensura mosu tan, atu VII Governu nee monu ka lamonu nee kestaun politika maibe dalan diak liu ba povu nee maka nee oinsa parpol kria consensus ba malu deit.

Prezidente Republika maka tenki iha responsabilidade atu bele responde ba diferente ideias husi partidu politiku sira neebe iha opozisaun, nunee mos partidu neebe mak iha bloku koligasaun.

Membru husi Komite 12 de Novembru Rogerio Castro da Cruz dehan oras nee povu akompanha hela situasaun no Prezidente Republika rasik hahu bolu lider husi partidu politiku lima neebe iha PN, atu rona opiniaun husi parpol no sei foti dezisaun ikus ba situasaun politika neebe lao oras nee.

Tuir PM Mari Alkatiri dehan ema balun komenta VII Governu konstituisional iha tempu badak sei monu, maibe nia garante nafatin katak governu sei lamonu. 

Justinho Manuel | Suara Timor Lorosae