sábado, 20 de janeiro de 2018

Prezidente timoroan rona partidu sira no halibur Konsellu Estadu iha semana oinmai


Prezidente timoroan simu iha semana oinmai partidu sira ne'ebé iha fatin iha parlamentu antes rona Konsellu Estadu, ne'ebé sei hanesan kontaktu loloos antes desidi solusaun ida ba difikuldade polítika iha Timor-Leste.

Fonte hosi Prezidénsia timoroan hatete ba Lusa katak partidu sira ne'ebé iha fatin iha parlamentu sei hasoru malu "iha tempu ne'ebé la hanesan" no tuir orden kuantidade nian iha loron-tersa, 23 Janeiru.

"Prezidente sei rona partidu sira ketak-ketak. Sei la rona hamutuk koligasaun Governu nian no mós bloku opozisaun nian", nia afirma.

Iha fulan hirak ikus ne'e, Prezidente timoroan rona beibeik ona líder sira nasaun nian, partidu polítiku sira, sosiedade sivil, líder relijiozu sira ho personalidade sira seluk, hodi buka solusaun ida ba krizi polítika.

Timor-Leste, iha fulan barak nia laran, hasoru hela períudu polítika ne'ebé laloos ho opozisaun, maioria iha Parlamentu Nasional, xumba programa Governu nian no proposta ida hosi Orsamentu Retifikativu, no aprezenta ona proposta ida sensura nian ba ezekutivu no proposta ida hodi hatún prezidente parlamentu nian.

Bainhira Governu monu, Prezidente timoroan iha kompeténsia hodi desidi aplika situasaun ne'ebé: Governu foun ida ne'ebé harii hosi kuadru parlamentar atual, ezekutivu ida hosi inisiativu prezidensial ka eleisaun antesipadu sira.

Eleisaun antesipadu sira hamosu asaun hodi fahe Parlamentu Nasional no, tuir Konstituisaun, bele akontese de'it iha mínimu fulan neen hafoin eleisaun, períudu ne'ebé sei kumpri iha loron-segunda oinmai.

Tuir orden, Francisco Guterres Lu-Olo sei simu, hahú hosi loron-tersa dadeer, delegasaun ida hosi Frente Revolucionária do Timor-Leste Independente (Fretilin) - ho fatin 23 iha Parlamentu Nasional no ne'ebé lidera koligasaun Governu nian - no delegasaun ida hosi Frente Revolucionária do Timor-Leste Independente (Fretilin) - ne'ebé kontrola fatin 22 no lidera Aliansa Maioria Parlamentar (AMP), hosi partidu sira opozisaun nian.

Hafoin ne'e maka sei simu delegasaun sira hosi Partidu Libertasaun Popular (PLP) - ho fatin ualu no iha opozisaun - hosi Partidu Demokrátiku (PD) - ho fatin hitu no hanesan membru hosi koligasaun Governu nian - no ikusmai hosi Kmanek Haburas Unidade Nacional Timor Oan (KHUNTO), ne'ebé nia deputadu na'in lima halo parte mós iha AMP.

Fonte hosi Prezidénsia esplika ona ba Lusa katak hafoin ne'e, iha loron-kuarta, hala'o reuniaun dahuluk hosi xefe Estadu atual, eleitu iha fulan-Marsu tinan liubá, ho Konsellu Estadu nian, ne'ebé entre nia kompeténsia sira sei ko'alia "kona-ba fahe Parlamentu Nasional" no kona-ba "demisaum Governu nian".

Prezidi hosi xefe Estadu, halo parte iha órgaun ne'e eis-Prezidente sira Timor-Leste nian, Xanana Gusmão, José Ramos-Horta ho Taur Matan Ruak, no personalidade sira seluk. Xanana Gusmão sei la partisipa tanba iha estranjeiru no lidera, fulan ne'e, negosiasaun foun sira ho Austrália kona-ba fronteira tasi nian.

Ramos-Horta agora daudaun hanesan ministru Estadu ho konselleiru ba Seguransa Nasional no Taur Matan Ruak eleitu deputadu iha eleisaun sira loron 22 Jullu tinan liubá, hanesan líder hosi Partidu Libertasuan Popular (PLP), no agora daudaun hanesan porta-vós hosi AMP.

Halo mós parte hosi órgaun ne'e, Prezidente hosi Parlamentu Nasional, Aniceto Guterres Lopes, primeiru-ministru Mari Alkatiri ho membru na'in lima ne'ebé maka haruka hosi Parlamentu no na'in lima hosi Prezidente.

Hosi parte Parlamentu nian maka José Belo, Aurora Ximenes, Virgilio Hornai, Virgilio Smith ho José Naimori. Naimori hanesan líder KHUNTO nian.

Prezidente indika ona Oscar Lima (lidera Kâmara Komérsiu), Faustino da Costa, Alcino Baris (atual prezidente Komisaun Nasional Eleisaun nian), Mari Dadi Soares Magno ho Laura Abrantes.

Enkontru sira sei hala'o loron antes hosi Parlamentu Nasional, ne'ebé tinan ne'e seidauk hala'o sesaun plenáriu ruma, hahú debate proposta sensura hasoru Governu ne'ebé maka aprezenta hosi partidu sira opozisaun nian.

Aniceto Lopes ajenda ona loron tolu ba debate ne'ebé karik sei hotu ho opozisaun maioria aprova proposta sensura, sei implika hatún Governu konstitusional dahitu, lidera hosi Mari Alkatiri.

Lei determina katak bele sobu Parlamentu Nasional, eleitu iha 22 Jullu, pelumenus liutiha fulan neen ka iha loron 22 Janeiru no katak eleisaun sira bele marka de'it ho prazu ida fulan rua ka hahú loron 22 Marsu.

Prosesu tuirmai, kontajen ho sertifikasaun votu sira nian, fó pose ba Parlamentu ho Governu, aprovasaun hosi programa no Orsamentu Jeral Estadu nian ba tinan 2018, implika atu rejimi duodésimu, ne'ebé hala'o dezde loron 01 Janeiru, bele aplika durante fulan neen dahuluk tinan nian.

SAPO TL ho Lusa

Sem comentários: