Funsionáriu LABELE Mete Polítika

DILI, (TATOLI) - Prezidente Komisaun Funsaun Públiku, Faustino Cardoso bolu atensaun ba funsionáriu públiku atu la bele mete polítika iha, servisu fatin no oras servisu nian. iha ona kazu rua mak Funsaun Públiku rejistu iha 2017-2018, funsionariu mete politika.

Apelu ne’e, Faustino Cardoso halo ba Diretór Jerál no Nasionál Inklui kargu Xefia seluk, iha enkontru trimestrál ne’ebé partisipa hosi servidór estadu ministériu hotu, iha salaun Ministériu Finansas Ai-tarak Laran, Sesta (19/01).

Nia husu ba funsionáriu tenke hala’o servisu ho imparsiál, hodi la halis ba partidu ida, servisu ho professional, servisu ho kualidade no responsabilidade.

“Alende ne’e, tuir devér jerál no espesífiku funsaun Públika hateten, funsionáriu Públiku tenke respeita lei no konstituisaun, lealdade ba ierarkia, lealdade ba estadu no seluk tan. Ida ne’e la’ós hatudu de’it iha servisu fatin maibé bele iha li’ur mós tenke hatudu nafatin kumprimentu ida ne’e, ʺ Faustino fó hanoin.

Hodi dehan, iha tinan tinan 2017 to’o inisiu 2018, KFP simu kazu indixiplina ne’ebé komete hosi funsionáriu públiku hamutuk 100 resin.

“Entre kazu sira iha kazu rua mak, kazu polítiku nian,” nia relata.

Enkuantu kazu ne’ebé KFP rejistu ona oras ne’e daudaun, KFP halo hela apuramentu, investigasaun hodi bele hatene loloos grau gravidade infrasaun, nune’e bele aplika sansaun.

Normalmente sansaun indixiplinar tuir lei Funsaun Públika hahú hosi represaun eskrita, suspensaun servisu, inatividade, no ikus liu tenke halo demisaun hosi funsaun Públika.

Jornalista: Agapito dos Santos | Editór: Manuel Pinto

Imajen: Prezidente KFP, Faustino Cardoso Gomes ba Ajénsia Notisioza Tatoli iha Óspital Nasionál Guidu Valadares (ÓNGV) dizemina informasaun ba profisionál saúde kona-ba kompeténsia nu’udar funsionariu públiku. Foto Tatoli/Zezito Silva