Embaixador foun Portugal nian iha
Díli, José Pedro Machado Vieira, aprezenta ona iha loron-sesta ne'e kredensial
sira ba xefe Estadu timoroan, Francisco Guterres Lu-Olo, hodi destaka relasaun
amizade vantajozu entre nasaun rua.
"Ha'u iha oportunidade hodi
hatudu honra boot hodi serbi iha Timor-Leste iha audiénsia ne'ebé maka ha'u iha
ho señór Prezidente ne'ebé garanti ona mai ha'u katak ami sei kontinua ami nia
relasaun amizade vantajozu no ne'ebé maka bele haree iha área oioin, liuliu iha
koperasaun portugeza, ho destake ba edukasaun, justisa, defeza ho seguransa
nasional", hatete hosi diplomata ba ajénsia Lusa iha Palásiu Prezidensial.
"Ami iha mós oportunidade
di'ak hodi fahe importánsia estratéjiku ne'ebé maka ami fó ba lian portugeza.
Simu di'ak tebes hosi señór Prezidente Repúblika", nia hatete.
Embaixador portugés hanesan
embaixador foun tolu ne'ebé maka hetan autorizasaun iha Timor-Leste, hamutuk ho
reprezentante sira hosi Estadus Unidus no Koreia-Súl, ne'ebé maka aprezenta,
ketak-ketak, karta kredensial sira.
Hafoin entrega karta kredensial
sira ba Francisco Guterres Lu-Olo no reuniaun badak ida entre sira, José Pedro
Machado Vieira simu ho guarda honra ida ne'ebé maka nia halo revista iha
Palásiu Prezidensial nia parte liur, ne'ebé toka mós hinu hosi nasaun rua ne'e.
Diplomata nomeadu ba knaar
embaixador nian iha Díli iha dekretu ida hosi Prezidente Repúblika portugés,
Marcelo Rebelo de Sousa, ne'ebé asina iha loron 14 Setembru 2017.
Antes kaer knaar sira iha Díli no
dezde tinan 2014, José Pedro Machado Vieira, sai ona nu'udar diretor hosi
Serbisu sira Ázia ho Oseánia nian, hosi Diresaun-Jeral hosi Polítika Externa
hosi Ministériu Negósiu Estranjeiru Portugal nian.
Iha nia postu dahuluk nu'udar
embaixador, José Pedro Machado Vieira, ne'ebé lisensiadu iha direitu, okupa
ona, entre funsaun sira seluk maka funsaun kónsul-jeral iha Hamburgu no kónsul
iha Santos, Brazil.
José Pedro Machado Vieira, moris
iha Angola, tinan 58, sai ona nu'udar xefe divizaun iha Núkleo hosi Prezidénsia
OSCE (Organizasaun ba Seguransa ho Koperasaun iha Europa, iha Diresaun-Jeral
hosi Asuntu Multilateral sira, destaka ona iha Diresaun hosi Serbisu sira
Instituisaun Komunitáriu sira nian no iha Delegasaun Permanente iha NATO iha
Bruxelas.
SAPO TL ho Lusa
Imajen: Embaixador foun Portugal
ba TL, Presidente da República e MNE de TL | Foto GMN TV - Jornal Nacional
Sem comentários:
Enviar um comentário