Diretor hosi Eskola Portugeza
Díli nian konsidera, iha loron-tersa ne'e, katak ranking sira hosi eskola sira
estraga realidade hosi sentru eskolar ne'e, kompara "realidade úniku"
ida ho eskola sira "ne'ebé buat hotu la hanesan" no la haree ba
aspetu sira hanesan susesu sira iha asesu universitáriu.
Iha tempu hanesan, Acácio de
Brito hatete ona ba Lusa, ranking sira "la haree ba efeitu eskola nian iha
alunu sira, impaktu aglutinador no formador hosi elite sira iha Timor-Leste no
ne'ebé, haree klaru, hanesan eskola di'ak liu iha Timor-Leste".
Maski iha análize ida ne'ebé
relasionadu duni ho nota sira iha ezame sira, nia hatete, referénsia sira
ne'ebé halo ba eskola la nota, hanesan ezemplu, klasifikasaun di'ak ba
matemátika ka nota di'ak sira iha ezame sira hosi ensinu báziku nian.
Acácio de Brito refere ba faktu
hosi eskola portugeza Díli nian destaka hosi nota negativu médiu sira ne'ebé
maka hetan iha ezame nasional sira, métodu ne'ebé uza hodi estabelese ranking
ida hosi eskola portugeza sira.
Análize ba rezultadu sira hosi
nota sira hosi alunu sira hosi eskola ualu ne'ebé situa iha nasaun sira ne'ebé
pertense ba Komunidade Nasaun sira Lian Portugeza nian hatudu katak iha kazu
hosi ezame nasional sira sekundáriu nian alunu sira hosi Makau ho Angola de'it
maka konsege média pozitivu.
Iha kazu Eskola Portugeza Díli
nian, média iha ezame nasional sira maka ho valor 7,60.
Acácio de Brito destaka faktu
hosi 75% alunu sira ne'ebé hakotu sekundáriu iha tinan 2017 konkore ona, ho
susesu, ba ensinu superior iha Portugal, "tama iha instituisaun sira no
kursu sira - medisina, enjeñaria, direitu ho farmásia - ne'ebé hanesan rigor
ne'ebé rekoñesidu".
"Sira seluk tama ona iha
universidade timoroan sira nian ka iha nasaun sira seluk", nia afirma.
Espesialidade hosi situasaun iha
Timor-Leste - ne'ebé ensinu lian portugeza hetan bandu durante tinan 24 nia
laran hosi okupasaun indonéziu - halo situasaun hosi eskola úniku nune'e nia
komparasaun ho sentru eskolar sira "laiha sentidu ruma".
Nia hatete katak ohin loron
eskola "hanesan duni eskola di'ak liu iha Timor-Leste" no iha líder
polítiku prinsipal ho responsável nasaun sira nia oan sira ne'ebé maka estuda
iha eskola.
"Ha'u nia opiniaun ne'e iha
baze hosi tinan 30 esperiénsia nian iha edukasaun. Ita labele ko'alia de'it iha
rezultadu akadémiku sira, ita tenki ko'alia iha rezultadu sosial sira, to'o mós
mudansa komportamental sira", nia afirma.
"Ami haree oinsá alunu sira
tama no ami haree efeitu eskola, oinsá sira sai", nia hatete, hodi destaka
susesu ne'ebé hetan iha Parlamentu Joven, iha konkursu sientífiku sira ne'ebé
maka promove hosi CERN, iha Suisa, no méritu individual sira hosi alunu barak.
Rekoñese susar sira ne'ebé iha,
diretor hosi eskola destaka empeñu maka'as hosi diresaun no hosi grupu dosente
hodi hametin formasaun ne'ebé fó ba alunu sira, ho protokolu sira ho instituisaun
sira iha nasaun laran no iha estranjeiru.
Acácio de Brito konsidera katak
eskola "kumpri nia misaun" no subliña aumentu hosi fatin dahitu iha
ranking sira no tanba tama iha fatin 621 entre fatin 633 relasionadu ho ezame sira
iha sekundáriu, maibé tama iha pozisaun 950 entre eskola sira iha báziku
hamutuk 1.221.
Média hosi eskola iha ranking
afetadu duni ho portugés, nune'e, responsável hosi sentru eskolar hatutan, ne'e
hanesan "realidade úniku" ne'ebé 90% hosi alunu sira iha eskola
hanesan ema timoroan, barak liu maka iha kontaktu úniku ho lian portugeza iha
eskola.
Nota global iha sekundáriu
afetadu, liuliu, tanba rezultadu ladi'ak sira ba portugés, ne'ebé nia média iha
ensinu sekundáriu maka ho valor 4 de'it, matemátika nia média maka valor 10,3.
Eskola Portugeza Díli nian, harii
iha tinan 2002, agora daudaun iha alunu hamutuk rihun resin ho profesor na'in
62, barak liu kontratadu iha Portugal.
SAPO TL ho Lusa
Sem comentários:
Enviar um comentário