Labarik hetan VD ho abuju seksual hamutuk 38

Diretora Fokupers,  Marilia da Silva Alves, hatete, iha fulan Janeiru to’o  fulan Fevereiru nia laran, iha labarik hamutuk 38 mak sai vítima ba kazu Violensia Domestika (VD) no abuju seksual, iha ne’ebé balun rekopera ona husi sira nia trauma, no balun sei iha hela uma mahon Fokupers.

“Haree ba total kazu ne’ebé Fokupers atende iha tinan 2017, iha 226,  no husi númeru ne’ebé mak iha ne’e barak liu mak kazu violensia domestika ba labarik sira, hahú husi fulan Janeiru to’o Dezembru tinan 2017, ho total 89, alende ne’e mos iha kazu seluk hanesan kazu abandona iha 45, no kazu abuju seksual iha 17, ne’ebé mak Fokupers atende iha 2017,” hatete Diretora Fokupers ne’e tersa (13 /02/ 2018) iha nia kna’ar fatin Fokupers Farol Dili.

Nia salienta, tama ba iha tinan 2018 fulan Janeiru to’o ulan Fevereiru data klaran, sira foin rekolla dadus kazu violensia domestika no abuju seksual hamutuk 38, ne’ebé tama iha tinan ida ne’e. Husi kazu refere iha tinan kotuk 2017, kazu ne’ebé prosesu iha tribunal 226 kazu, foin iha kazu 9 iha  prosesu final, no kazu seluk sei la’o hela.

“Ami fo atendimentu ba labarik ne’ebé sai vítima  ba kazu sira ne’e, bazeia ba durante ne’e,  família husi vítima sira mak lori mai, no balun mai rasik, no mos  refere husi parseiru sira iha referal, no wainhira vitima sira mai uma mahon Fokupers halo uluk acesment hodi hatene tuir dadus no kronolojia husi vitima sira” hatutan Marilia.

Nia realsa liu tan, dala ruma vítima labarik minoria  ne’ebé hetan abuju seksual no violasaun domestika sempre trauma, no susar sira atu konta sai kronolojia kazu ne’ebé sira hasoru, tamba ne’e Fokupers sei halo aprosimasaun, no hein sira preparadu atu koalia mak foin bele hetan dadus no kronoljia, hafoin mak lori kazu refere ba prosesa iha Polisia no parte kompetente sira seluk.

“Ami durante ne’e halo akompañamentu legal, no ami mos oferese terapia atu nune’e bele rekopera vítima sira nia kondisaun, tamba ha’u hanoin ba liu labarik sira kazu insestu, hanesan aman no avo rasik halo abuju seksual, presiza tempu kleur  to’o tinan ida, mak vítima sira ne’e bele rekopera husi nia kondisaun ne’e,” dehan diretora Fokupers ne’e. Oly

GMN TV | Grupo Média Nacional