Organizasaun nasional oioin no
sidadaun timoroan na'in 70 hakerek ona ba Prezidente Repúblika hodi hatudu
preokupasaun kona-ba konjuntu ida hosi mudansa ba kuríkulu sira pré-eskola no
siklu dahuluk ne'ebé sira konsidera hanesan halo lahó avaliasaun sientífiku
adekuadu.
Karta refere katak mudansa sira
aprova ona "derepente" no kontra estudu oioin ne'ebé apoia ona
kuríkulu ne'ebé uza daudaun, no sei mantén maski iha mudansa hosi dekretu sira,
ne'ebé sei hahú implementa de'it iha tinan 2019.
Iha loron antes xefe Estadu
anunsia disolusaun hosi Parlamentu - ne'ebé implika atu ezekutivu tama iha
jestaun - Governu aprova ona mudansa ba dekretu polémika rua tinan 2015 nian
ne'ebé hatama uzu hosi lian inan sira iha pré-eskolar no inísiu ensinu báziku
nian, halo portugés hanesan lian prinsipal hahú de'it iha siklu datoluk.
Lurdes Bessa, visi-ministra
Edukasaun, esplika ona ba Lusa katak dekretu-lei rua ne'ebé maka aprova iha
loron-kuarta ne'e muda, respetivamente, dekretu 3/2015 kona-ba kuríkulu
nasional hosi baze edukasaun pre-eskolar no 4/2015 kona-ba kuríkulu hosi siklu
dahuluk no daruak hosi ensinu báziku, abranje estabelesimentu tomak edukasaun
nian iha rede públiku.
"Asaun ne'ebé ami halo maka
avansa ho proposta sira mudansa nian ba dekretu rua ne'ebé defini uzu hosi lian
inan sira iha sala aula", Bessa esplika iha deklarasaun sira ba Lusa, hodi
hatutan katak mudansa sira reflete programa hosi ezekutivu no desizaun hosi
Kongresu Nasional Edukasaun nian ba datoluk, ne'ebé akontese iha tinan liubá
iha Díli.
Ema sira ne'ebé asina karta ne'e
husu ba xefe Estadu, Lu-Olo, hodi labele promulga mudansa sira tanba sira
konsidera katak kuríkulu ne'ebé uza daudaun "la hanorin lian nasional sira
(lian inan sira) maibé permiti ba profesor sira iha tinan dahuluk sira hodi uza
lian sira ne'e bainhira sira presiza hodi apoia ba komprensa ho
inkluzaun".
"Metodolojia ne'e hatudu ona
iha estudu oioin hodi aumenta susesu eskola ida ba estudante sira. Objetivu
ikus hosi métodu ne'e maka atu labarik sira hotu hosi nasaun ne'e iha
komprensaun di'ak hosi lian ofisial rua, nune'e mós komprensaun iha matemátika,
siénsia no disiplina sira seluk, to'o final hosi siklu daruak", konsidera
hosi organizasaun sira.
Karta ne'e asina hosi
organizasaun sira Fokupers, Knua ba Labarik, Alola Foundation, ACbit, AJAR,
La'o Hamutuk, Belun, Haburas, Permatil, MOFFE ho Timor-Leste Women's Network no
mós hosi sidadaun na'in 70.
Iha karta sira esplika katak
partisipa ona, entre tinan 2013 no 2017, iha "konsulta ho kolaborasaun
oioin" kona-ba asuntu ne'e, no "senti hakfodak bainhira rona kona-ba
mudansa sira ne'ebé halo derepente lahó konsulta ruma.
"Ami entende katak kuríkulu
sira ne'ebé hala'o funsiona hodi motiva no valoriza duni partisipasaun hosi
alunu sira no aprendizajen ativu. Ne'e hanesan susar halo bainhira alunu sira
la konsege entende nia profesor sira ka labele konsege hatudu espresaun
ruma", refere hosi karta.
"Ami komprende mós
importánsia krítiku hosi partisipasaun hosi aman-inan sira iha eskolaridade oan
sira nian no susar hosi partisipasaun ne'e akontese bainhira aman-inan sira la
hatene saida maka oan sira aprende hela", sira konsidera ho defende
"metodolojia hosi progresaun linguístika".
Sentra iha "mudansa boot
haat", dekretu ne'ebé aprovadu abranje kestaun sira hanesan
"definisaun hosi lian ofisial sira hanesan lian sira hosi ensinu, fó
prioridade ba portugés hanesan lian ensinu nian no tétum hanesan lian suporte
nian".
Lian nasional sira defini hanesan
"patrimóniu kultural ho históriku, hodi iha tratamentu ne'ebé di'ak iha
área ne'e", esplika mós hosi visi-ministra.
Governu desidi mós publika karga
horáriu mínimu hosi ensinu pré-eskolar, hosi oras rua ba oras haat iha loron
ida, no sei muda mós karga horáriu "ba ensinu hosi kapasidade linguístika
iha lian tétun ho lian portugés", nia hatutan. Kuríkulu atual la fahe lian
rua no fó karga horáriu sira ne'ebé ki'ik tebes. Ami fahe fali ne'e no iha
relasaun ba ensinu iha kompeténsia sira iha lian portugeza, iha nível
pré-eskolar no báziku, ami aplika karga horáriu ida hanesan ho karga horáriu
hosi ensinu ba matemátika", nia hatutan mós.
Testu sira hosi mudansa ne'e
inklui kestaun rua seluk, liuliu ensinu inkluzivu "ne'ebé la previstu
antes", hodi hatama edukasaun psikomotora iha pré-eskolar no edukasaun
fízika iha báziku.
Hodi defende nia proposta iha
Konsellu Ministru, Ministériu Edukasaun destaka "nesesidade hosi
estabilidade no koerénsia kona-ba aplikasaun hosi polítika edukativu iha
Timor-Leste" no mós "nesesidade hodi klarifika pozisaun sira
referente ba lian sira ne'ebé uza iha sistema edukativu".
"Implementasaun hosi
polítika edukativu iha Timor-Leste, tenki halo ho dalan koerente no
konsistente, hodi proteje Lei ne'ebé previstu no mós prezerva sistema ida hosi
ensinu inkluzivu, ne'ebé permiti igualdade ba asesu ba oportunidade sira
formasaun nian ba sidadaun timoroan tomak", hatutan dokumentu ne'e.
SAPO TL ho Lusa
Sem comentários:
Enviar um comentário