Empreza Xina Sei Transforma Tasi Ba Bee-moos

KOVALIMA, (TATOLI) – Primeiru Ministru, Marí Alkatiri, hateten iha empreza ida hosi Xina maka sei halo estudu ba tasi hodi transforma sai bee-moos.

Xefe Governu esplika empreza ne’e sei fó solusaun ba komunidade ne’ebé hasoru difikuldade ba bee-moos durante ne’e.

“Investimentu ne’e sira nian, depois sira fa’an fali bee ne’e ba Governu hodi supply fali ba iha populasaun”, hato’o hodi hatan ba autoridade lokál sira hosi Kovalima nia preokupasaun kona-ba bee-moos liuhusi konsultasaun Programa Sétimu Governu iha salaun administrasaun munisipiu Kovalima, postu administrativu Suai, sesta ne’e.

Ba Kovalima, nia tenik, empreza ne’e sei forneses bee-moos ba populasaun hamutuk 100,000 ka komunidade tomak, segundu ba komunidade Atauro no ikus ba Aeroportu Oekusi.

“Atu ho maneira saida de’it, bee ba Kovalima sei rezolvidu. Ha’u la’os mai promete maibé fiar katak ida ne’e sei akontese”, afirma.

Empreza hosi Xina ne’e, nia tenik, halo akordu ona ho Governu foin lalais ne’e no iha tempu besik projetu estudu ba bee-moos sei hahú.

Nia haktuir iha programa Sétimu Governu Konstitusional, prioridade primeiru maka bee-moos ba komunidade iha Timor laran tomak.

Jornalista: Xisto Freitas | Editora: Rita Almeida

Imajen: Primeiru-Ministru, Marí Alkatiri, bainhira hatan preokupasaun komunidade Kovalima iha atividade konsultasaun programa governu dahituk nian iha salaun administasaun munísipiu Kovalima, ohin. Foto GPM