Julie Bishop: Tratadu fronteira nian ho Timor-Leste hanesan kapítulu foun iha relasaun bilateral

Tratadu fronteira tasi nian entre Timor-Leste ho Austrália, ne'ebé sei asina iha loron-tersa iha Nova Iorke marka kapítulu foun ida iha relasaun bilateral entre nasaun rua, afirma hosi xefe diplomasia australianu liuhosi komunikadu.

"Iha loron 06 Marsu, sei hamutuk ho ha'u líder sira hosi Timor-Leste hodi asina "Tratadu istóriku entre Austrália ho Repúblika Demokrátika Timor-Leste ne'ebé estabelese sira nia limiti marítimu sira iha tasi Timor nian'", refere hosi Julie Bishop ne'ebé maka haktuir hosi komunikadu.

"Ne'e marka kapítulu foun ida iha ami nia relasionamentu ho Timor-Leste, hakbesik ami hanesan viziñu sira ne'ebé fahe fronteira ida no hanesan parseiru sira ho belun sira", nia esplika no rekorda katak asinatura sei asisti hosi sekretáriu-jeral ONU nian, António Guterres, no hosi prezidente Komisaun Konsiliasaun nian, Peter Taksøe-Jensen.

Ne'e hanesan komentáriu ofisial úniku hosi Governu australianu kona-ba final hosi negosiasaun kona-ba tratadu ne'ebé hotu ona iha fulan liubá iha Kuala Lumpur, Malázia.

Maski iha pedidu oioin hosi Lusa ba deklarasaun sira, to'o agora Julie Bishop nia gabinete seidauk fó resposta ruma.

Hosi parte timoroan nian, dokumentu ne'e sei asina hosi atual ministru Adjuntu hosi primeiru-ministru ba Definisaun Fronteira nian, Agio Pereira.

Tratadu, ne'ebé seidauk hatene konteúdu loloos kona-ba akordu, tau iha liña fronteira nian pozisaun ne'ebé maka Timor-Leste defende hodi tau liña iha dalan klaran entre nasaun rua ne'e.

Liña ida ne'ebé administrasaun kolonial portugeza, okupante indonéziu sira ho dirijente timoroan sira defende beibeik katak tenki tau iha fatin ne'ebé maka agora sei tau no ne'ebé formaliza pose hosi rekursu sira ne'ebé, to'o agora, Timor-Leste tenki fahe ho Canberra.

Momentu istóriku importante taka siklu ida ho polémika ne'ebé dura ona durante dékada oioin, protestu sira no negosiasaun maka'as sira hodi defini liña ida ne'ebé nia indefinisaun kusta ona ba Timor-Leste dolar biliaun lima, haktuir hosi kálkulu ne'ebé halo hosi La'o Hamutuk.

Dezde restaurasaun independénsia nian hamosu ona relasaun negativu entre Estadu rua ne'e, marka beibeik iha relasaun entre Governu australianu ho povu timoroan nian.

Tratadu hosi fronteira tasi nian ne'ebé maka Timor-Leste ho Austrália sei asina iha loron-tersa iha Nova Iorke hanesan rezultadu hosi teste ida ba instrumentu sira hosi Lei Tasi nian no, iha konkretu, ba Prosedimentu hosi Konsiliasaun Obrigatóriu (PCO).

Ronda negosial maka'as hamutuk 11, durante fulan 19 nia laran, hodi hetan akordu ida ne'ebé ema optimista sira hanoin katak sei demora tinan barak nia laran no ema pesimista sira hanoin katak sei laiha rezultadu.

Negosiasaun sira, ho apoiu hosi painel ida hosi espesialista internasional na'in lima no asisténsia hosi Tribunal Permanente Arbitrajen nian, hala'o iha ámbitu hosi Konvensaun ONU nian kona-ba Lei Tasi nian (ne'ebé koñesidu ho sigla UNCLOS).

Prosesu hahú iha loron 11 Abril 2016, bainhira Timor-Leste notifika Austrália - dokumentu ne'ebé entrega hosi embaixador timoroan nian iha Canberra, Abel Guterres - hodi hamosu PCO, hodi halo Canberra tuur hamutuk iha negosiasaun sira no defini fronteira tasi sira permanente entre nasaun rua ne'e.

SAPO TL ho Lusa