Xanana Gusmão, ne'ebé lidera
ekipa Timor-Leste nian hodi halo negosiasaun ba tratadu foun hosi fronteira
tasi nian ho Austrália, sei la partisipa iha serimónia asinatura hosi dokumentu
istóriku, konfirma hosi fonte diplomátika timoroan ba Lusa.
"Antes hanoin kona-ba nia
partisipasaun iha serimónia iha Nova Iorke maibé ami simu informasaun katak sei
la partisipa", hatete hosi fonte ida ba Lusa. Informasaun ne'e konfirma
hafoin hosi fonte sira seluk iha Nova Iorke no iha Díli.
Laiha ema ida maka esplika motivu
hosi auzénsia Xanana Gusmão nian iha asinatura ba dokumentu ne'ebé sei hala'o
iha tuku 17:00 (oras Nova Iorke nian), iha loron-tersa iha sede ONU nian.
Iha semana liubá, Governu
timoroan fó sai ona katak, la hanesan ho planu antes, primeiru-ministru, Mari
Alkatiri, sei la partisipa iha serimónia iha Nova Iorke.
Iha momentu ne'ebá, ezekutivu
esplika katak "laiha sentidu" Mari Alkatiri nia viajen hafoin
konfirma tiha ofisialmente katak xefe Governu australianu nian sei la marka mós
prezensa.
Iha semana ne'e, ezekutivu fó sai
ona nota ida hodi klarifika katak "hafoin kontakta tiha Misaun Permanente
hosi Repúblika Demokrátika Timor-Leste nian iha ONU, iha Nova Iorke, Governu
Austrália nian laiha intensaun hodi reprezenta nia Primeiru-Ministru, Malcom
Turnbull, maibé serimónia asinatura nian ba akordu definisaun fronteira tasi
nian sei hala'o hosi Ministra Negósiu Estranjeiru australianu, Julie
Bishop".
Auzénsia hosi líder na'in rua
ne'e akontese hafoin fulan barak iha tensaun polítika entre Governu koligasaun
nian, lider hosi Fretilin, no opozisaun, lidera hosi Congresso Nacional da
Reconstrução Timorense (CNRT), Xanana Gusmão nian.
Tensaun ne'e halo Prezidente
Repúblika, Francisco Guterres Lu-Olo, foti desizaun hodi sobu parlamentu no
konvoka eleisaun antesipadu.
Bainhira líder na'in rua ne'e
halo viajen to'o Nova Iorke, sei sai hanesan enkontru dahuluk entre sira dezde
Xanana Gusmão sai hosi Timor-Leste, iha fulan-Setembru tinan liubá. Líder
timoroan ne'e seidauk fila ba nasaun.
Tratadu ne'e sei asina hosi atual
ministru Adjuntu hosi primeiru-ministru ba Definisaun Fronteira nian, Agio
Pereira - reprezenta Timor-Leste - no hosi ministra Negósiu Estranjeiru
australianu, Julie Bishop, reprezenta Austrália.
Sekretáriu-jeral ONU nian,
António Guterres, ho prezidente hosi Komisaun Konsiliasaun nian, Peter
Taksøe-Jensen, ne'ebé halo mediasaun ba negosiasaun sira entre nasaun rua, sei
sai sasin ba asinatura.
Ajenda kalkula katak delegasaun
rua ne'e sei hasoru malu antes serimónia asinatura, tuir deklarasaun hosi
signatáriu na'in rua no hosi sasin na'in rua no, hafoin ne'e maka iha
konferénsia imprensa hamutuk ida.
Loron ne'e sei hotu ho resepsaun
ofisial ida ne'ebé sei iha deklarasaun sira hosi Julie Bishop ho Agio Pereira.
Tratadu, ne'ebé seidauk hatene
konteúdu loloos kona-ba akordu, tau iha liña fronteira nian pozisaun ne'ebé
maka Timor-Leste defende hodi tau liña iha dalan klaran entre nasaun rua ne'e,
haktuir hosi konfirmasaun sira hosi fonte sira ne'ebé maka partisipa iha
negosiasaun sira ba ajénsia Lusa.
Liña ida ne'ebé administrasaun
kolonial portugeza, okupante indonéziu sira ho dirijente timoroan sira defende
beibeik katak tenki tau iha fatin ne'ebé maka agora sei tau no ne'ebé formaliza
pose hosi rekursu sira ne'ebé, to'o agora, Timor-Leste tenki fahe ho Canberra.
Tratadu ne'e hetan hosi teste ida
ba instrumentu sira hosi Lei Tasi nian no, iha konkretu, ba Prosedimentu hosi
Konsiliasaun Obrigatóriu (PCO).
Ronda negosial maka'as hamutuk
11, durante fulan 19 nia laran, hodi hetan akordu ida ne'ebé ema optimista sira
hanoin katak sei demora tinan barak nia laran no ema pesimista sira hanoin
katak sei laiha rezultadu.
Negosiasaun sira, ho apoiu hosi
painel ida hosi espesialista internasional na'in lima no asisténsia hosi Tribunal
Permanente Arbitrajen nian, hala'o iha ámbitu hosi Konvensaun ONU nian kona-ba
Lei Tasi nian (ne'ebé koñesidu ho sigla UNCLOS).
SAPO TL ho Lusa
Sem comentários:
Enviar um comentário