domingo, 22 de abril de 2018

MP Suai Loke Ona Investigasaun ba Atividade Arte-ritual iha Ainaro


DILI: Ministériu Públiku (MP) Suai loke ona investigasaun ba atividade arte-ritual ne’ebé hala’o husi Aliansa Mudansa ba Progresu (AMP) iha Ainaro foin lalais.

PNTL lori ona kazu ne’e ba ministériu públiku Suai tanba iha indikasaun forte viola rezolusaun governu nian ne’ebé validu hela iha lei númeru 5/2017, koalia kona ba taka arte-marsiais, bandu atu la hetan atividade treinu husi arte-marsiais ho arte-ritual nomos ulitiza armas brankas.

“Ha’u hakarak hatete hanesan ne’e arte-marsiais ne’e desportu ida ne’ebé loke ba ema hot-hotu ne’e lei la bandu maibé lei so bandu mak iha arte-marsiais tolu ne’ebé iha Timor hanesan PST, KORKA ho KERA SAKTI nune’e mós arte-ritual ne’ebé iha lei nia laran temi sira nia atividade tomak kona ba taka ne’e,”dehan Komandu Operasionál PNTL, Hendrique da Costa, Kuarta (19/04) iha salaun PDHJ.

Komandante Henrique ne’e dehan, atividade-ritual ne’e hala’o molok kampaña AMP nian. Tanba ne’e tuir nia katak assuntu ne’e ketak husi kampaña politika iha Ainaro.

“Atividade ne’e hala’o kalan, kampaña ne’e hahú fila fali iha aban maibé karik ida ne’e mak polisia detekta iha kampaña ruma mak hanesan ne’e polisia sei la husik liu tanba ne’e kontra lei,”tenik nia.

Antes ne’e, públiku preokupa ba atributu organizasaun arte-marsiais KORK nian (hena KORK ne’ebé tara ba Xanana ho Taur) iha serémonia arte-rituál fó matak malirin ba Xanana Gusmão ho Taur Matan Ruak iha Ainaro foin lalais.

Maibé Vise Kordenadór Komisaun Judisiariu AMP, Tiago Sarmento klarifika ona katak, atividade rituál iha Ainaro loron 9 fulan-Abril foin lalais ne’e seidauk iha tempu kampaña.

Nia esplika, kampaña hahú iha loron 10 fulan-Abril, entretantu atividade ritual hala’o ona iha loron 9 fulan-Abril antes. Tanba ne’e, nia dehan atividade ritual ne’e la viola lei bainhira laiha krime. 

Martinha Gusmão | Independente

Sem comentários: