domingo, 22 de abril de 2018

Abílio Araújo: “Tinan 10 nia laran buat barak la’o lalós”


Membru Comite Central FRETILIN (CCF) Abílio Araújo hateten, iha tinan 10 nia laran buat barak la’o lalós, liu-liu relasaun ho dezenvolvimentu iha rai laran.

Tanba ne’e Abílio Araújo dehan, prontu simu dezafia husi lider sira atu debate konaba dezenvolvimentu.

Maibé debate konaba rezisténsia, Abílio Araújo deklara, nia labele debate ho lider rezisténsia Xanana Gusmão, tanba nia hola parte direta iha vida gerilleiru.

“Atu dehan deit, atu ba debate ne’e ha’u la hakfodak. Irmaun Xanana rasik nia hakerek konaba ha’u dehan Abílio Araújo uluk estudante ida brilhante, ne’e katak sa? Estudante ida ne’ebé nabilan, sempre númeru 1, desde primária to’o seminariu, liseu no to’o iha universidade iha Portugal, tamba ne’e ha’u atu ba dabate ho nia, atu debate saida? Ne’ebé di’ak liu haree lai,” dehan Abílio Araújo iha kampaña eleitorál partidu ho númeru sorteiu hat (4) FRETILIN nian iha Munisípiu Baucau Kinta (19/04/2018).

Maibé Abílio Araújo afirma, koalia konaba funu no konaba gerrilha ne’e nia bele lakon tamba nia la partisipa iha gerrilha, tanba nia mós rona istória barak konaba Xanana iha vida gerrilha.

“Kampaña ida ne’e, ami 74,75, hakfodak ba ami la’os tiha fundador, kamarada Marí rasik nu’udar fundador ASDT, FRETILIN, maibé ema seluk dehan katak, nia la’os fundador FRETILIN, ne’e sala no ne’e bosok. Nune’e duni ohin, atu fahe Frenti Armada, Diplomátika no Frenti Klandestina, sira hatene katak, fundador sira 74,75, oras ne’e hamutuk ona, tamba dala barak rona istória oi-oin, sira iha rai liur, sira la halo buat ida, maibé dokumentu iha, filmajen iha, livru iha no gravasaun hotu iha”, nia haktuir.

Abílio Araújo fundamenta, frenti diplomátika nia kontribuisaun maka’as liu, iha tinan hira ne’ebá referendum iha tinan 1999. Oly

GMN TV | Grupo Média Nacional

Sem comentários: