Alfándega Sei Submete Karta Ba MP Sobre Bebida Alkólika Ne’ebé Laliu Prosesu Normál

DILI, (TATOLI) – Diretór Jerál Autoridade Aduaneira (AA), José António Fátima Abílio, hatete bebida alkólika ho kuantidade 58 ne’ebé Alfándega no Autoridade Inspesaun Fiskalizasaun ba Atividade Ekonómika no Sanitária (AIFAESA) apreende iha estabelesimentu rua Xineza nia hatudu rezultadu pozitivu katak laselu taxa, nune’e sei submete ba Ministériu Públiku (MP).

José dehan hafoin Alfándega observa iha merkadu katak iha tua balun ne’ebé tama mai Timor-Leste, maibé laliu husi prosesu normál, nune’e estabelese ekipa no koopera ho AIFAESA hodi halo inspesaun fízika ba estabelesimentu sira.

“Husi parte Alfándega haree tua ne’e nia importa selu taxa ka la’e? Se selu dokumentasaun tenke iha, se laiha automátikamente Alfándega hamutuk ho AIFAESA apreende no afavór ba Estadu. Ne’ebé asaun ne’ebé ami halo ne’e rezultadu pozitivu duni tua barak ne’ebé sira laselu taxa”, Diretór Jerál ne’e dehan iha serbisu fatin eis edifísiu Ministériu Planu no Finansas, ohin.

Nune’e liuhusi inspesaun konjunta ne’ebé halo foin lalais ne’e foti ona tua ho iten 58 no daudaun halo karta ba MP tanba ladeklara no ne’e konsidera hanesan krime. Husi númeru tua ne’e ho nia marka no volume alkol lahanesan.

José esplika katak tua sira ne’e laliu husi Alfándega tanba dalaruma importadór sira hatama mai falsifika dokumentu ou infiltra iha kontetór laran.

“Sira buka espasu ne’ebé mamuk ne’e hatama para oukupa espasu kontainer nian no ida ne’e sira larejista. Sira sempre buka meiu oinsá atu halo liu sira-nia merkadoria sira ne’e hodi hetan lukru sira ne’ebé adisionál no ida ne’e mak presiza ita halo kooperasaun di’ak entre AIFAESA no ministériu relevante para halo kontrolu ida ne’ebé mak efetivu, mas husi asaun ne’ebé ami foti ne’e sei kontinua halo iha loja sira iha Timór laran”.

Tua sira ne’e daudaun foti ona ne’e seidauk iha distribuidór ida mak hato’o dokumentu hodi justifika katak selu ona taxa tanba ne’e sei prosesa ba MP. “Agora atu haruka de’it ba Ministériu Públiku. Ha’u hein finaliza tiha karta para depois aban hanesan ne’e bele haruka ona ba”.

Jornalista: Maria Auxiliadora | Editora: Rita Almeida

Imajen: Bebida alkólika ne’ebé deskonfia laliu husi Alfándega. Foto/AIFAESA

Le’e mós:

AIFAESA no AA Apreende Bebida Alkólika Iha Meimart

DILI, (TATOLI)-Autoridade Inspesaun no Fiskalizasaun ba Atividade Ekonómika no Sanitária (AIFAESA) hamutuk ho Autoridade Aduaneira (AA) liuhusi inspesaun konjuntu apreende bebida alkólika hamutuk 423 iha loja Meimart, Audian tanba deskonfia laliu husi Alfándega. Koordenadór AIFAESA, Abílio Oliveira Sereno, hatete AIFAESA hetan kooperasaun di’ak hamutuk ho AA ne’e deskobre katak iha buat balun ne’ebé fa’an laliu … Continue reading