Governu Sei Dezenvolve Ajénsia Notísia Tatoli Sai Profesionál

DILI, (TATOLI) – Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, hateten, Governu daualuk kompromete sei dezenvolve ajénsia notísia Tatoli sai profesionál hodi reprezenta Estadu ba komunidade internasionál.

“Ajénsia Tatoli maka tenke sai fonte prinsipál ba ita nia Estadu iha rai liur, tanba ne’e ita iha kompromisu atu dezenvolveʺ, dehan Sekrétariu Estadu ba jornalista sira hafoin halo enkontru ho Prezidente eleitu ba ajénsia Tatoli, Rosario da Graca Maia, iha Palásiu Governu, ohin.

Bainhira ájensia funsióna ho di’ak, nia dehan sei destaka mós jornalista sira iha nivel nasaun sira iha sudeste aziatika.

ʺPolitikamente ita hakarak halo, tanba ne’e ita sei apoiu maka’as para nia bele konsolida servisu institusionalmente, haree fasilidade no rekursu umanu para sira halo servisu di’ak liutánʺ, Akara hateten.

SEKOMS mós husu ona atu Tatoli hahú uniformaliza informasaun Estadu  no governu ho lian inglés no portugés atu Nasaun sira iha liur bele asesu.

Kona-ba pose ba Prezidente ajénsia, Merício Akara hateten Governu sei buka meius atu fó ona pose iha tempu besik.

ʺBa oin ita tenke fó pose para hala’o kna’ar ho di’ak liu, tanba ne’e hau fó tempu ba prezidente ajénsia atu fó tempu ba ha’u loron ida  ka rua hodi haree tok apoia polítika ba oinʺ, dehan Governante.

Atu garante funsiomentu instituisaun ne’e maka governante ne’e fó ona orientasaun ba kargu diretór sira atu haree teknikamente orsamentu hodi apoiu instituisaun ne’e to’o prezidente eleitu simu pose.

Entretantu, Prezidente eleitu ba ajénsia TATOLI, Rosario da Graca Maia, hateten hasoru malu ne’e atu diskute funsionamentu instituisaun ne’e ba futuru.

ʺHa’u mai atu konfirma ho sekretáriu Estadu kona-ba planu governu nian ba oin, espesifíkamente oinsá ajénsia TATOLI bele funsionaʺ, hateten.

Tuir loloos prezidente ajénsia simu ona pose iha governu dahituk, maibé tanba problema polítika no orsamentu, impede prosesu ne’e to’o ohin.

Jornalista: Agapito dos Santos | Editora: Rita Almeida

Imajen: Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, enkontru ho Prezidente eleitu ba ajénsia TATOLI, Rosario da Graca Maia, iha Palásiu Governu, ohin. Foto Antonio Goncalves