Seidauk iha Solusaun Ba Lista Kandidatu Membru Governu

DILI, (TATOLI) - Primeiru-Ministru, Taur Matan Ruak, rekoñese katak to’o oras ne’e seidauk iha solusaun ba lista kandidatu membru Governu Da-ualu Konstitusionál ne’ebé atu simu pose iha segunda faze nian.

“Ami seidauk iha solusaun ida kona-ba lista,” Xefe Governu hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin enkontru ho Prezidente-Repúblika, Francisco Guterres Lú Olo, kona-ba lista membru Governu.

Maske nune’e, nia dehan, sira kontinua mantein diálogu ho Prezidente-Repúblika para bele hetan solusaun definitivu ida nune’e membru Governu sira bele simu tomada pose atu garante funsionamentu normál governasaun da-ualu ninian.

Taur informa, hafoin hetan solusaun ba lista maka bele haree tempu oinsá atu defini loron ba seremónia tomade pose membru Governu.

“Hanesan primeiru-ministru, kuantu-mais sedu di’ak liu. Tanba, ita nia Estadu oras ne’e funsiona de’it ho orsamentu duo-désimu. Ita agora osan laiha. Ba oin, ami tenke prioritiza programa Governu, orsamentu ba tinan 2018 nomós 2019 nian no lei orgániku Governu nian rasik,” nia esplika.

Antes ne’e, Xefe Estadu deklara katak nia la’ós veta ka impede membru Governu balun atu simu tomada pose, maibé nia husu ba Primeiru-Ministru, Taur Matan Ruak, atu tetu didi’ak molok involve pesoál balun ne’ebé nia kazu iha hela Tribunál ba lista membru Governu.

Jornalista: Xisto Freitas | Editór: Manuel Pinto

Imajen: Enkontru entre Prezidente Repúblika, Francisco Guterres Lú Olo, ho Primeiru-Ministru, Taur Matan Ruak, kona-ba lista membru Governu ne’ebé maka atu simu pose iha segunda faze. Imajen Ajénsia Tatoli/Egas Cristóvão