DILI, (TATOLI) - Prokuradór Jerál
Repúblika, José da Costa Ximenes, hateten Gabinete Sentrál Kombate Korrupsaun
no Kriminalidade Organizada iha Ministériu Públiku (MP) nia tutela, durante
fulan neen (janeiru-junu 2018), rejistu prosesu hamutuk 96.
Hosi prosesu 96 ne’e, nia
informa, konsege termina prosesu hamutuk 47 no hosi prosesu 47 ne’ebé terminadu
ne’e, prosesu hamutuk 25 maka Ministériu Públiku halo ona akuzasaun no arkiva
prosesu hamutuk 22.
“Gabinete Kombate Korrupsaun no
Kriminalidade Organizada durante fulan neen, akompaña prosesu ne’ebé iha
julgamentu desizaun finál (tránzitu julgadu) hamutuk 46.000. Ne’e la konta ho
sira ne’ebé durante investigasaun rekopera ona. Restante ne’ebé iha
investigasaun ne’e aban bainrua iha desizaun finál maka ami fó sai informasaun
detallu,” Ximenes hato’o informasaun ne’e ba jornalista sira iha Palásiu
Prezidente Nicolau Lobato, Bairru Pité, Dili, kuarta ne’e, hafoin soru-mutu ho
Prezidente Repúblika, Francisco Guterres Lú Olo.
Aleinde ne’e, nia salienta,
perante 1 janeiru-30 Juñu 2018, iha kazu krime ne’ebé tama iha Ministériu
Públiku hamutuk 2300.
Entre 2300 prosesu ne’e, nia
esplika, maioria rejista iha Dili hamutuk 1300 resin, Baukau okupa segundu
lugar ho kazu purvolta liu 400, Suai okupa terseiru lugar ho kazu liu 300 no
Oe-Cusse maka rejista kazu ki’ik liu.
“Entre prosesu sira ne’ebé
entrada, ita konsege finaliza kazu hamutuk liu 2000. Entre kazu liu 2000 ne’e,
Ministériu Públiku konsege halo akuzasaun purvolta 1400 itál prosesu no arkiva
prosesu purvolta 1100 iha territóriu Timor laran tomak,” Prokuradór Jerál
tenik.
Jornalista: Xisto Freitas | Editór:
Manuel Pinto
Imajen: Prokuradór Jerál
Repúblika (PJR), José Ximenes. Foto Tatoli/Egas Cristovão
Sem comentários:
Enviar um comentário