quarta-feira, 4 de julho de 2018

A. Conceição Rekomenda Ba Governu Kria Merkadu Iha Territóriu Timór

PARTILHAR

DILI, (TATOLI) - Eis–Ministru Komérsiu no Indústria (MKI), António da Conceição, enkoraja Governu foun atu kria kondisaun ba merkadu iha territóriu Timor-Leste no propoin atu kria sentru ida iha Baukau, Maliana no Same ho intensaun atu hamenus urbanizasaun populasaun mai Dili.

“Hanoin mós sentru komersiál ida ne’ebé akordu asinadu no empreza ne’e sediadu iha Timor-Leste ne’ebé atu realiza iha Rai-Kotu. Ida ne’e importante tebes tanba atu dezmobiliza vendedór sira ne’ebé agora iha hela Kampung Alor nian hodi sira bele oukupa filafali espasu iha ne’ebá hodi bele halo sira-nia atividade komersiál”, António rekomenda ida ne’e iha Bebora, ohin.

Nune’e labele halo konsentrasaun grupu espesífiku ruma iha nasaun ne’e no ida ne’e ba estabilidade, polítika país ne’e.

“Ida ne’e mak ha’u propoin de’it atu halo dezmobilizasaun vendedór husi Kampung Alor bá iha Rai-Kotu ne’ebá no tenke mós sai atu buka fatin iha abitante nia leet atu aluga, envezde sira konsentra iha Mesjid An-Nur nian. Ida ne’e kazu sensivel, maibé ha’u rekomenda tebes atu ida ne’e tende ser halo dezmobilizasaun hodi nune’e ita bele garante estabilidade polítika iha rai-laran”.

Aleinde ne’e rekomenda mós sentru prosesamentu alimentár ne’ebé inisia akordu asinadu millaun 20 ho Governu Xina atu halo sentru prosesamentu alimentár rua iha Baukau no Natarbora ne’ebé estudu halo hotu ona no osan mós alokadu ona.

“Agora téknikamente sira halo hela estudu dezeñu signifika katak hein de’it atu implementasaun konstrusaun ba fasilidade sira ne’e. Ha’u hein Governu ida ne’e bele fó kontinuidade”.

Iha parte seluk Governu bele haree kona-ba merkadu fronteira nian ne’ebé tenke moderniza merkadu ne’e hodi bele halo impedimentu no balansu ba atividade komersiál.
“Maibé ita haree kondisaun merkadu Indonézia nian favoravel liu duké Timor-Leste. Agora, ita tenke kria kondisaun ida atu normaliza no moderniza”.

Atuál deputadu ne’e mós propoin  parke industriál ne’ebé sei halo iha Tibar, maibé nia tenke abranje to’o iha Ulumera tanba parke ne’e la’ós halo iha espasu ki’ikoan ida ne’ebé mak komplementa fasilidade portu ne’ebé mak atu harii hodi bele hahú ona atividade komersiál iha país ne’e.

“Ida seluk importante tebes mak ha’u hahú tiha ona no rezultadu ne’ebé mak bele dehan di’ak tebes husi Sétimu Governu nian mak dekretu lei ne’ebé mak estabelese institutu kualidade ne’ebé harii iha Ministériu Komérsiu atu hahú kontrolu kualidade ba produtu nasionál nian atu tama bá merkadu internasionál no ida ne’e importante atu Governu ida ne’e bele fó kontinuidade”.

Eis ministru ne’e dezeja atu ministru foun ne’ebé mak tutela iha instituisaun ne’e bele ona ko’alia sobre atividade komérsiu esportasaun nian. “Ita labele hanoin beibeik kontrolu kualidade produtu importasaun ne’ebé mak ita lori hela de’it mai ita-nia rai”.

Jornalista: Maria Auxiliadora | Editór: Manuel Pinto

Imajen: Ministru Komérsiu Indústria no Ambiente (MKIA), António da Conceição. Foto Antonio Goncalves
PARTILHAR

Author: verified_user

Publicação luso-timorense sem fins lucrativos

0 comentários: