Primeiru-ministru timoroan hatete
iha loron-tersa katak maski diálogu ho Prezidente maibé seidauk hetan solusaun
hodi fó pose ba membru ezekutivu na'in 11, mantén esperansa iha solusaun ida
iha tempu badak.
"Ami ko'alia nafatin kona-ba
lista no seidauk iha solusaun ida (...). Ami kontinua diálogu hodi buka
solusaun definitivu ida", Taur Matan Ruak hatete iha loron-tersa ne'e
hafoin reuniaun foun ida ho Prezidente timoroan, Francisco Guterres Lu-Olo.
Primeiru-ministru admiti katak
demora hodi fó pose ba membru na'in 11 - inklui elementu importante sira hosi
ezekutivu - hanesan "afeta daudaun ezekutivu".
"Bainhira fó pose sedu di'ak
liu. Estadu funsiona hela ho duodésimu no agora laiha ona osan. Ami presiza
programa, orsamentu 2018 nian no 2019 nian, orgániku hosi Governu. Iha buat
barak atu halo", nia hatete.
Durante reuniaun iha loron-tersa
ne'e, Taur Matan Ruak entrega ona ba Francisco Guterres Lu-Olo dokumentu ida
ne'ebé aprova iha reuniaun ida Governu nian hodi aprova pedidu demisaun hosi
brigadeiru-jeneral Filomeno Paixão de Jesus hosi kargu visi-xefe Estadu Maior
hosi Forsa Armada nian, antes bele okupa kargu nu'udar ministru Defeza.
"Ohin, ha'u entrega ona
dokumentu ba señór Prezidente Repúblika hodi kontinua avansa iha prosesu ne'e.
Konsellu Superior Defeza no Seguransa bele hasoru malu no foti desizaun ikus
hodi konklui prosesu", nia esplika.
Governu daualuk hahú serbisu
bainhira seidauk kompletu no hafoin Prezidente la fó pose ba membru na'in 11
hosi membru na'in 41 ne'ebé maka hato'o hosi Taur Matan Ruak.
Entre naran sira ne'ebé Lu-Olo la
simu iha elementu sentral sira hosi partidu sira AMP nian no hosi organigrama
ezekutivu nian, inklui ministru Estadu ho Kordenador hosi Asuntu Ekonómiku sira
ho ministru Finansa.
Lu-Olo nia desizaun halo Xanana
Gusmão, líder AMP nian, informa katak la simu pose nu'udar ministru Estadu ho
Konselleiru primeiru-ministru nian, no ministru Petróleu ho Mineral, Alfredo
Pires, la marka mós prezensa iha serimónia.
Hahú hosi momentu ne'ebá no ho
reuniaun formal sira hosi Konsellu Ministru sira, fonte sira AMP nian esplika
katak "membru tomak hosi ezekutivu", sira ne'ebé maka simu ona pose
no mós sira seluk, halo reuniaun nafatin hodi prepara hahú ezekutivu.
Iha entrevista ba Lusa iha
loron-kinta, Prezidente Timor-Leste insisti katak hanesan importante atu AMP
no, "liuliu, señór primeiru-ministru, hanoin iha eskolla ba elementu sira ne'e".
"Ha'u tenki hatete klaru
katak ema sira ne'ebé maka hili ona hodi halo parte iha elenku governamental,
ema balun hetan ona akuzasaun definitivu hosi órgaun judisial sira", nia
afirma.
"Nune'e maka ha'u bolu de'it
atensaun ba señór primeiru-ministru hodi hanoin eskolla hosi elementu sira ne'e
hodi halo parte iha Governu", nia insisti.
Admiti katak bele iha difikuldade
ida, bainhira partidu sira hosi Governu mantén lista ne'ebé hato'o ona, Lu-Olo
rekorda ona "esperiénsia hosi pasadu" ne'ebé maka "membru balun
[hosi Governu] hetan ona akuzasaun definitivu hosi tribunal sira no la kopera,
no subar iha imunidade nia kotuk".
"Labele halo hanesan ne'e.
Señór primeiru-ministru tenki hanoin di'ak asaun sira. Nia hatete ona
dalabarak: katak la aseita ema sira ne'ebé envolve ho korupsaun hodi halo parte
iha Governu. Nia hatete iha momentu ne'ebá", Lu-Olo afirma.
SAPO TL ho Lusa
Sem comentários:
Enviar um comentário