Prezidente timoroan nomeia ona,
iha loron-sesta ne'e, membru na'in tolu foun ba Governu Konstitusional daualuk,
entre sira maka Xanana Gusmão, ne'ebé sei kaer pasta ampliadu bainhira asumi
funsaun sira hosi membru ida seluk ne'ebé maka hato'o hosi ezekutivu maibé
ne'ebé maka seidauk bele simu pose.
Aleinde ministru Estadu ho
Konselleiru primeiru-ministru nian, Xanana Gusmão sei kaer fali knaar sira
ne'ebé maka nia kaer ona iha Governu Konstitusional daneen nu'udar ministru
Planeamentu no Investimentu Estratéjiku, agora nia kaer iha ezekutivu ida
ne'ebé lidera hosi Taur Matan Ruak.
Dekretu hosi nomeasaun asina ona
hosi Prezidente Repúblika, iha loron-sesta ne'e, no publika iha Jornal
Repúblika inklui mós nomeasaun hosi Filomeno Paixão nu'udar ministru Defeza.
Iha dekretu seluk ida, publika
mós iha loron-sesta ne'e, Lu-Olo demiti Paixão hosi kargu númeru daruak hosi
Forsa Defeza Timor-Leste nian (F-FDTL).
Lista hosi nomeadu na'in tolu
inklui mós ba sekretáriu Estadu Peska nian, Rogério Araújo Mendonça.
Maski sira na'in tolu hetan
nomeasaun formal, fonte hosi Prezidénsia no fonte hosi gabinete
primeiru-ministru nian konfirma ona ba Lusa katak na'in ida de'it, Filomeno
Paixão, maka sei simu pose iha loron-segunda.
Dekretu ne'ebé publika iha
loron-sesta ne'e la rezolve difikuldade tomak ne'ebé maka sei mantén entre
Prezidente ho primeiru-ministru, Taur Matan Ruak, kona-ba grupu dahuluk hosi
ema na'in 11 ne'ebé maka xefe Estadu la fó pose iha loron 22, bainhira Governu
daualuk hahú knaar sira.
Aumentu hosi Xanana Gusmão nia
funsaun sira sujere akordu ida iha kazu ruma, ida hosi Gastão de Sousa, ne'ebé
nia naran halo parte hanesan ministru Planeamentu ho Investimentu Estratéjiku
no ne'ebé maka Prezidente la fó pose, liuliu tanba envolve iha prosesu judisial
ne'ebé hala'o daudaun.
Fonte hosi Aliansa Mudansa ba
Progresu (AMP), koligasaun hosi maioria absoluta ne'ebé apoia Governu, admiti
dezisti iha kazu Gastão nian no hosi ministru seluk ida, Marcos da Cruz, tanba
sira halo parte iha kazu sira iha tribunal sira.
Maibé, kontinua rejeita pozisaun
hosi Lu-Olo ne'ebé hakarak trava grupu ida hosi pelumenus ema na'in hitu seluk
ne'ebé, karik, envolve iha kazu sira seluk iha investigasaun no na'in rua seluk
tanba "kestaun étika sira".
Entre naran sira ne'ebé Lu-Olo la
simu iha elementu sentral sira hosi partidu sira AMP nian no hosi organigrama
ezekutivu nian, inklui ministru Estadu ho Kordenador hosi Asuntu Ekonómiku sira
ho ministru Finansa.
Lu-Olo nia desizaun halo Xanana
Gusmão, líder AMP nian, informa katak la simu pose nu'udar ministru Estadu ho
Konselleiru primeiru-ministru nian, no ministru Petróleu ho Mineral, Alfredo
Pires, la marka mós prezensa iha serimónia.
Situasaun polítika iha
Timor-Leste halo Prezidente Repúblika kansela ona nia partisipasaun iha simeira
CPLP nian iha Cabo Verde, iha fulan ne'e, maibé mantén intensaun hodi vizita
Portugal maski viajen ne'e seidauk iha konfirmasaun total.
Fonte konfirma ona katak desizaun
ne'e komunika ona iha loron-kuarta iha karta ida ne'ebé Francisco Guterres
Lu-Olo haruka ona ba Parlamentu Nasional - ne'ebé tenki aprova viajen sira hosi
xefe Estadu ba estranjeiru - ne'ebé muda pedidu anterior ida.
Iha testu foun ne'e, Lu-Olo
mantén pedidu hodi halo vizita Estadu ba Portugal - nia viajen previstu ba
loron-tersa - no kansela pedidu ba vizita ba Cabo Verde.
Karta ne'e avalia ona iha
konferénsia hosi líder sira hosi bankada sira iha parlamentu ne'ebé aprova ona
nia ajendamentu ba debate ho votasaun iha sesaun loron-segunda nian iha parlamentu.
Maibé, fonte sira hosi opozisaun,
admiti katak autorizasaun ne'e labele fó tanba difikuldade ne'ebé maka eziste
entre Lu-Olo ho primeiru-ministru, Taur Matan Ruak, kona-ba grupu ida hosi
membru sira ezekutivu nian, ne'ebé hasai hosi serimónia simu pose hosi Governu
daualuk, iha fulan liubá.
"Ami hein iha
loron-segunda", hatete hosi deputadu ida hosi opozisaun.
SAPO TL ho Lusa
Sem comentários:
Enviar um comentário