sábado, 7 de julho de 2018

MNEK no Prezidente-Repúblika Deskuti Vizita Estadu Ba Portugal


DILI, (TATOLI) – Ministru Negósiu Estranjeiru no Kooperasaun (MNEK), Dionísio Soares Babo, hala’o enkontru ho Prezidente Repúblika, Francisco Guterres Lú Olo, kona-ba preparasaun Xefe Estadu nian vizita Estadu ba Portugal iha semana oin, 10 jullu.

“Ohin ha’u mai hato’o ba Prezidente Repúblika kona-ba ajenda vizita ba Portugal,” Dionísio hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, sesta ne’e.

Iha vizita ne’e, Prezidente Lú Olo sei hala’o enkontru loron rua tui-tuir malu (12-13 jullu) ho Prezidente-Repúblika Portugal, Primeiru-Ministru Portugal nomós sei hala’o vizita ba Parlamentu Nasionál Portugal, hodi ko’alia kona-ba asuntu sira ne’ebé iha relasaun ho nasaun rua (TL no Portugal) nia nesesidade no posívelmente sei asina akordu intendementu iha área edukasaun.

Intendementu iha área edukasaun ne’e, nia haktuir, sei haruka profesór timoroan sira ba tuir formasaun iha Portugal hodi hakle’an lian portugés nomós oinsá haruka diretór eskola primária-sekundária atu aprende kona-ba jestaun iha ne’ebá (Portugal).

“Ita hein katak asuntu ida ne’e tama hotu iha konkordánsia. Agora daudaun tékniku sira hosi nasaun rua deskuti hela asuntu ne’e iha nível tékniku no karik konkorda malu entaun Xefe Estadu na’in rua sei asina,” governante ne’e tenik.

Nia hatutan ekipa téknika hosi Timor-Leste dezloka uluk ona ba Portugal hodi halo koordenasaun ho ekipa téknika Portugal ninian kona-ba vizita refere.

Vizita Xefe Estadu nian ne’e, sei akompana hosi Ministru Negósiu Estranjeiru, Dionísio Soares Babo.

Jornalista: Xisto Freitas | Editór: Manuel Pinto

Imajen: Ministru Negósiu Estranjeiru no Kooperasaun, Dionísio Soares Babo.

Sem comentários: