Taur Matan Ruak Espera Servidór Estadu Sei La Halo “Gol Bunuh Diri”

DILI, (TATOLI) - Primeiru Ministru, Taur Matan Ruak apela atu servidór estadu iha ministériu hotu, liu-liu Palásiu Governu tenke servisu iha ekipa, maibé ida mak servisu hanesan lori fali bola ba hatama iha ita nia guarda rede, Timor-Leste sei lá manan mukit no ki’ak.

Taur Matan Ruak mós sente privilejiadu bainhira servisu hamutuk ho funsionáriu no membru governu sira iha Palásiu governu. Atu alkansa objetivu, funsionáriu, membru governu ho Primeiru Ministru tenke sai ekipa ida iha servisu.

“Ita-nia objetivu boot ida de’it, ita tenke manan. Satan ita-boot sira haree agora Kopa Mundial iha Russia, karik iha jogu, sira na’in sanulu resin ida joga mak ida seluk lori bola halai tama fali nia guarda rede ne’e ita lala’o ba oin, ne’e hatudu katak ita la’ós team ida i ha’u fiar ita-boot sira iha ne’e sei la iha ida mak lori fali bola ba hatama iha ita nia guarda redi. Ne’e ita “bunuh diri”.

“Ita hotu-hotu nia atensaun ida de’it ita tenke manan, manan saida? Manan mukit no ki’ak iha ita-nia ra’in”, Primeiru Ministru Oitavu governu hato’o iha nia diskursu bainhira sai Inspetór Serimónia hasa’e Bandeira Nasionál ba dahuluk hanesan Xefe Governu iha Resintu Palásiu Governu, Segunda dadeer ohin.

Nu’udar Xefe Governu, Taur Matan Ruak fó hanoin, atu funsionáriu públiku (Servidór Estadu) tenke kumpre prinsípiu servisu tolu; ida mak Pontulidade tama serbisu, daruak mak, prazu serbisu no ikus liu, tenke hatene halo saida iha serbisu fatin.

“Ha’u haree funsionáriu barak mak halimar game to’o fila ba uma i ha’u espera ita-nian iha Palásiu Governu la iha ida ke hanesan ne’e”, Xefe Governu kurizé.

Nu’udar lian ikus nian, perante Ministru Estadu Prezidénsia Konsellu Ministru Agio Pereira, Ministru Reforma Legislativa no Asuntu Parlamentár Fidelis Leite Magalhães, Sekretáriu Estadu Komunikasaun Sosiál, Mericio Akara, Kargus Xefias, Assesores no Funsionáriu sira ne’ebé serbisu iha Palásiu Governu.

Taur Matan Ruak dehan, funsionáriu ida-idak katak ema na’in ida vale-an hanesan soldadu ida ou militár ida, la’ós atu ba halo funu hanesan uluk gerileirus sira halo iha ai-laran, maibé atu halo funu ba dezenvolvimentu nasionál hodi hatutan eroi rihun 200 resin ne’ebé sakrifika an ona hodi husik hela nasaun ne’e ba ita hodi ohin ita goza.

Tanba ida ne’e, Eis gerileru ne’e fiar katak, funsionáriu sira sei fiar iha misaun lulik ida ne’e.

Ekipa Redasaun

Imajen: Primeiru Ministru, Taur Matan Ruak hato’o diskursu bainhira sai Inspetór Serimónia hasa’e Bandeira Nasionál ba dahuluk hanesan Xefe Governu iha Resintu Palásiu Governu, Segunda dadeer ohin.