PPN SEI REKOLLA KARETA PRADO HUSI EIS DEPUTADU

Prezidente Parlamentu Nasionál (PPN) V lejislatura, Arão Noe, promete, sei rekolla kareta Prado husi eis deputadu III lejislatura ne’ebé to’o IV lejislatura lakonsege rekolla hotu, nune’e bele deside fali ba deputadu V lejislatura atu kontinua uza kareta tuan ka atu sosa foun.

Líder máximu orgaun lejislador ne’e informa, asunte ne’e nia parte sei diskute iha reuniaun konsellu administrasaun parlamentar, inklui asuntu aloka orsamentu sosa kareta foun ka lae, desizaun iha konsellu administrasaun Parlamentar nian.

“Ida ne’e ami sei reuniaun konsellu administrasaun, semana realiza reuniaun ne’e, tanba iha Tersa semana kotuk hili ona membru ba konsellu administarsaun, agora falta reprezentante husi funsionariu sira PN nian, maibe tuir kalendariu funsionariu sira nian, Segunda (ohin) mak foin eleje nia membru nu’udar reprezentante husi funsionariu nian, hodi tur iha konsellu administrasaun, kuandu membru ne’e kompletu ona mak ami foin halo konvokatoriu ida para bele reunianu konsellu administrasaun nian,”relata Prezidente Parlamentu Nasionál, Arão Noe ba jornalista hafoin reuniaun líder bankada Sesta (29/06/2018).

Eis xefi bankada CNRT ne’e garante, nia parte sei bele rekolla hotu, kareta husi eis deputadu sira III lejislatura nian. “Ne’e pasti”dehan Arão Noe ba jornalista sira, bainhira husu nia esperansa.

Enkuantu, membru ba konsellu administrasaun Parlamentar hamutuk nain 10, inklui suplente nain 5 no efetivu nain 5, kompostu husi bankada FRETILIN nain 2, CNRT nain 2, PLP 2, PD 2 no KHUNTO nain 2.

Total kareta Prado ne’ebé eis deputadu III lejislatura sira seidauk konsege entrega iha lejislasaun ba dahaat nian, hamutuk 20. Maibe kona-ba dadus atual, GMN tenta konfirma ho Sekretariu Jeral Parlamentu Nasionál, maibe nia parte lakohi fo komentáriu. Say

GMN TV | Grupo Média Nacional