sexta-feira, 3 de agosto de 2018

Autralia sei la asina Paktu Mundial ba Migrasaun

PARTILHAR
Ministru Interior Australia afirma loron-kinta ne'e katak nia nasaun sei la asina Paktu Mundial ba Migrasaun, ne'ebé konklui iha fulan-Jullu iha ONU, tanba konsidera katak afeta sira nian soberania.

"Ami lori ho sériu konservasaun seguransa ami nian fronteira sira. Ami la permite ONU ka sira seluk atu perturba ami nian serbisu makas ne'ebé maka ami halo hela", hatete Peter Dutton ba radio australiana 2GB.

Ministru ne'e mós afirma tan katak nasaun europeu sira balun lakon sira nian identidade tanba nakonu ho imigrante sira ne'ebé la iha dokumentu sira. "Iha jerasaun sira tuirmai ne'e sei iha impaktu ida ne'ebé boot ba sosiedade sira ne'e", konsidera.

Governu australianu hetan kritika barak hosi organizasaun internasional sira, inklui mós ONU, tanba politika ne'ebé rigorozu kontra imigrante ilegal sira iha nasaun, ne'ebé maka tenta atu tama nasaun ne'e liu hosi tasi.

Australia nega atu simu refuziadu Nauru no Papua Nova Guiné nian atus ida resin, ne'ebé maka agora ne'e hein hela atu Estadus Unidus simu sira.

Dokumentu ne'ebé koñesidu ofisialmente hanesan Paktu Mundial ba Migrasaun Seguru, Regular no Ordenada ne'e, estrutura ho obrjetivu 23 no inklui ho kompromisu sira ne'ebé konkretu oioin, maski la vinkula juridikamente, ne'ebé define diferensa entre imigrante regular sira no sira ne'ebé laos, no serbisu baziku sira tenki tau iha ordem Estadu sira ba iregular sira ka kuandu atu fasilita sira nian regularizasaun.

Paktu ne'e rezultadu hosi akordu ida ne'ebé asina iha tinan 2016 hosi lider internasional sira ne'ebé maka desidi hodi loke negosiasaun ba akordu boot rua, ida konaba migrante sira no ida seluk konaba politika migratoriu nian.

Numeru migrante sira iha mundu hamutuk millaun 258, ne'ebé maka koresponde ba 3,4% hosi populasaun mundial.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: