DILI, (TATOLI) - Komandante Jerál
Polísia Nasionál Timor-Leste (PNTL), Komisáriu Júlio da Costa Hornay, hato’o
kazu asidente no insidente sira ba Prezidente-Repúblika (PR), Francisco
Guterres Lú Olo, iha Palásiu Prezidente Nicolau Lobato, Bairru Pité, kinta (2/8).
Nia haktuir, iha fulan juñu no
jullu nia laran akontese asidente hamutuk 106 no entre númeru asidente ne’e
rezulta ema na’in lima mate, entretantu, insidente (violénsia doméstika no
ofensa integridade fíziku simples/fén ho la’en baku malu) hamutuk 109.
“Kazu hirak ne’ebé akontese oras
ne’e iha hela prosesu investigasaun kriminál, katak, submete ona ba Ministériu
Públiku, balun hein hela delegasaun kompeténsia, balun hein mandadu
kapturasaun, mandadu detensaun, balun prepara hela ba julgamentu primeira instánsia.
Ida ne’e maka prosesu ne’ebé ita nia polísia atende durante fulan juñu no jullu
nia laran,” Júlio informa.
Nia mós dehan katak situasaun
en-jerál iha Timor laran la’o hakmatek no importane ba povu Timor maka kontinua
mantein maturidade polítika.
“Populasaun nia devér maka halo
serbisu hodi sustenta án rasik no estuda. Kestaun impase polítika ne’e ita
hotu-hotu fó fiar ba líder nasionál sira atu rezolve. Otimista katak impase
polítika loron ida sei to’o nia rohan,” Hornay tenik.
Jornalista: Xisto Freitas | Editór:
Manuel Pinto
Imajen: Enkontru entre Komandante
Jerál PNTL, Júlio da Costa Hornay, ho Prezidente-Repúblika, Francisco Guterres
Lú Olo, ne’ebé hola parte mós Segundu Komandante Jerál PNTL, Faustino da Costa
no Xefe Kaza Militár Prezidénsia-Repúblika, Komandante Mau-Kalo. Imajen Mídia PR
Sem comentários:
Enviar um comentário