Governu promete selu dívida Hospital Sanglah

Governu liu husi Vise Ministru Saúde, Asuntu Dezenvolvimentu Planu Estratéjiku Saúde, Bonifacio Maucoli dos Reis, deklara, Governu liu husi Ministériu Saúde promete atu selu dívida Hospital Sanglah Bali, Indonesia ho montante US$ 800.000.

Vise Ministru Saúde Asuntu Dezenvolvimentu Planu Estratéjiku Saúde, Bonifacio Maucoli Dos Reis, hateten, dívida ne’ebé mak iha ne’e responsavel Governu nian, tanba ne’e hakarak ka lakohi Ministériu Saúde tenki selu maibe husu ba Hopital Sanglah atu kontinua fo tratamentu ba pasiente sira tanba pasiente nia vida importante.

“Dívida ne'e Governu nian tanba ne'e ami iha komitmentu atu selu ida ne'e, maioria dívida ne’e husi ospitais rai liur sira ne'ebe mak ita nia pasiente sira halo tratamentu ba no ita manda ona karta ofisial ida ba para sira kontinua fo tratamentu ba ita nia pasiente to’o bainhira ita nia governu ne’e selu”, Bonifacio Maucoli Dos Reis, informa ba jornalista sira iha Hopital Nasional Guido Valadares sesta foin lalais ne’e.

Antes ne’e Diretor Nasional Apoio Hospitalar no Emerjensia, Horacio Sarmento, informa katak, Hospital Sanglah prolonga tan tempu fulan ida ba Governu Timor Leste atu tenki selu dívida ne’ebé mak iha.

“Sira fo tan tempu fulan ida ba ita para selu sira nia dívida maibe agora dadauk sira kontinua fo antendimentu ba ita nia pasiente sira tanba ha’u hato’o tiha ona karta ida ba sira para bele fo tan tempu ba ita”, Horacio Informa.

Hospital Sanglah Denpasar Bali, foin lalais mos fo ona ultimatu ba Governu Timor Leste atu tenki selu dívida ho total US$800.000, iha inisiu fulan ne’e maibe realidade seidauk selu, tanba ne’e Hospital Sanglah fo tan tempu fulan ida.

Total dívida ne’ebé mak dadauk ne'e Ministériu Saúde iha hamutuk millaun US$ 2, tantu Indonesia, Singapura no Australia.Ola

GMN TV | Grupo Média Nacional