FRETILIN dúvida Governu ezekuta millaun US$700 liu

Deputada opozisaun Fretilin, Maria Ângelica Rangel liu hosi audiénsia públika ho Ministériu Planu Finansa (MPF), iha Sesta (17/08/2018), dúvida ho VIII Governu atu ezekuta hotu osan ho montante millaun US$700 liu iha tempu fulan 4 nian laran, iha tinan 2018.

“Hau’-nia dúvida mak, Governu iha kapasidade ka lae? halo ezekusaun millaun US$700 liu, iha períodu ida badak ne’e, tanba ita hatene, husi kalendariu ne’ebé komisaun C Parlamentu Nasionál hasai, katak loron 10 fulan Setembru mak OJE ne’e foin lori ba Prezidente Repúblika atu promulga, tanba iha ne’eba mós Prezidente sei iha tempu atu halo análiza orsamentu ne’e, depois sei publika, no ministériu finansa rasik sei reuni fali ho ministériu hotu atu fahe orsamentu ne’ebé aprovadu no promulga husi Prezidente Repúblika,” hateten deputada Maria Ângelica Rangel iha audiênsia públika ho MPF ne’e.

Tuir Deputada bankada Fretilin ne’e, presija tan fulan prosesu orsamentu remata, tanba ne’e tempu atu ezekuta loloos hela fulan 3, tanba ne’e nia parte dúvida ho kapasidade Governu nia atu ezekuta, liu-liu konaba transferênsia públika no bens servisu ne’ebé prevé ho pursentu bo’ot.

“Ita presija tan fulan ida nune’e, ita bele konta dehan fulan 3 de’it mak atu halo ezekusaun, bele kalae?, tanba hau haré husi konstrusaun orsamentu ne’e, ba hau dúvida, tanba laiha indísius ida prinsipiu iha orsamentu ne’e rasik, tanba iha kategoria ne’ebé ministra lei sai husi proposta OJE ne’e, ita haré iha tranferensia públika 20 % no bens servisu 32% husi OJE,”dehan deputada Maria Rangel.

Hatan ba preokupasaun husi deputada opozisaun ne’e, ministra interina planu finansa, Sara Lobo, hateten, Governu laiha dúvida atu ezekuta OJE 2018, liu-liu kona-ba bens servisu, tanba OJE ne’ebé Governu prevé inklui atu selu mós dívidas ba pagamento funsionariu kontratadu sira ne’ebé lakonsege iha regime duodésimu.

“Konaba kapasidade ezekusaun, liu-liu konaba bens servisu, ami tau osan ami mós tau osan atu selu kompromísu ne’ebé mak Estadu ne’e iha, liu-liu refere ba servisu kontratais, ba dívida no pagamentu sira ne’ebé mak akumuladu hela, no lakonsege halo iha rejime duodésimu, tanba limitasaoens ne’ebé iha duodésimu, halo ita labele ultrapassa tempu ne’ebé mak define, no mós ezekusaun laliu husi fulan ida, tanba difikuldade sira ne’e hotu mak akumula hela pagamentus bo’ot barak mak, agora ita foin tau iha OJE 2018, hodi regulariza,” esplika Ministra interina Planu finansa ne’e.

Ministra finansa ne’e klarifika, konaba ezekusaun la sai kestaun ba VIII Governu, tanba prosesu hotu iha faze halo pagamento, bainhira OJE 2018 ne’e aprova no promulgadu.

“Hau hakarak esklarese katak, kapasidade ba ezekusaun, la’os kestaun ida agora, tanba prosesu sira ne’e iha hotu faze atu halo pagamentu, bainhira orsamentu aprova, sistema loke, ministériu ida-idak sei prosesa sira nia kontas ka obrigasoens ne’ebé pendente hela durante ne’e iha sira-nia meja leten,”Sara Lobo esklarese.

Proposta Orsamentu Jeral Estadu ba tinan 2018, VIII Governu prevé billiaun US$1.2, kompostu husi dotasaun orsamentu 2018 husi Janeiru to’o Juñu hamutuk millaun US$402.1, estimativa ba fulan Jullu to’o Augostu millaun US$100.4, atu ezekuta iha fulan Setembru to’o Dezembru, tinan 2018 hamutuk millaun US$715.5. Say

GMN TV | Grupo Média Nacional