Prezidente
timoroan defende iha loron-segunda ne'e, iha Dili, atu kria Servisu Síviku
Nasional ida hodi "hanorin no haforsa joven sira" no Konsellu
Estratéjiku Militar ba kuadru superior forsa defeza sira.
Francisco
Guterres Lu-Olo koalia iha serimónia aniversáriu Falintil nian ba dala 43,
brasu armadu Frente Revolusionaria Timor-Leste Independente (Fretilin) no,
dezde 1987, brasu armadu rezisténsia timoroan ne'ebé mak iha loron 1 Fevereiru
2001 muda tiha ba atual forsa defeza (F-FDTL).
Iha
diskursu ne'ebé mak fo omenajen ba espiritu Falintil nian, Lu-Olo defende katak
presiza, liuhosi pensaun sira ka programa seluk ne'ebé eziste ona, atu valoriza
ex-membru sira Falintil nian ne'ebé mak agora diriji F-FDTL no ne'ebé "atu
husik moris militar ne'e iha tempu badak nian laran.
"Hare
ba nia esperiénsia no nia matenek no nia idade ne'ebé avansada presiza halo
reflesaun ho urjénsia konabá oinsá atu envolve sira iha konsolidasaun F-FDTL
nian no konstrusaun Timor-Leste ho valores no prinsipiu sira luta nian, ne'ebé
maka konsagra ona iha Konstituisaun Republika Demokratika Timor-Leste",
Hatete Prezidente timoroan.
Iha
medida seluk mak, Lu-Olo defende atu kria "programa reinsersaun sosial ba
ex-membru sira Falintil no F-FDTL (desmobilizadu iha tinan 2011 no 2015) ne'ebé
mak sei iha kapasidade hodi hadiak sira nian moris no sira nian familia".
Lu-Olo
mós sujere atu kria unidade espesial ida iha hospital sira hotu iha munisipiu
sira "ba veteranu sira no kombatente Libertasaun Nasional sira no sira
nian familia".
Prezidente
mós defende formasaun ba nivel munisipal ho ekipa responsavel ida hodi organiza
komemorasaun sira aniversariu Falintil nian, halo levantamentu ba dadu sira
hamutuk ho ex-kombatente sira no hatudu "forma oinsá maka Estadu bele
apoia projetu sira ne'ebé bele hadia moris diak, ho baze ba inisiativa rasik
hosi ex-kombatente sira".
Xefe
Estadu mós konsidera katak presiza aselera "mapeamentu ba fatin interese
istoriku sira iha teritoriu laran tomak", no habelar inisiativa ne'ebé
maka halo ona iha Dili no bele "sai importante ba promosaun turismu
istóriku".
Konabá
Servisu Síviku Nasional, Lu-Ola apoia proposta ida ne'ebé mak anvansa hosi antesesor
no atual primeiru-ministru, Taur Matan Rua, no konsidera importante "ba
jerasaun sira joven ne'e bele iha nafatin espiritu Falintil nian".
"Programa ne'e permite atu joven sira iha sentidu ierarkia, espiritu
disiplina no dedikasaun, no hanorin sira atu hadomi no defende interese povu
nian no Estadu nian", hatete
"Entidade
relevante Estadu nian, ho apoiu Konsellu Estratéjiku Militar, tenki identifika
nesesidade sira Forsas Armadas no halo asaun rekrutamentu ida ho tuir
nesesidade sira ne'e", akresenta.
Ho
prinsipal individualidade sira nasaun ne'e nian, Lu-Olo fó hanoin forsa
istórika Falintil nian, ne'ebé ho naran kontinua halo parte F-FDTL hanesan
"ponte entre pasadu gloriozu no loron ohin nian" no hanoin mós
"espíritu" antigu guerilleiru timoroan sira.
Lu-Olo,
ne'ebé mak hanesan xefe Estadu maka komandante supremu F-FDTL, ne'bé pertense
ba Falintil, ne'ebé luta kontra okupasaun indonezia too nia fin, iha tinan
1999.
"Hanesan
politiku no hanesan guerilleiru, ne'ebé asisti, rona, no sente halerik hosi ami
nian povo sira iha foho, ho korajen no determinasaun, durante tinan 24",
fó hanoin mós.
Lu-Olo
sauda esforsu sira ne'ebé halo too iha ne'e hodi apoia veteranu sira no
kombatente sira ba luta libertasaun ne'e, inklui mós aprovasaun foun ba dekretu
ne'ebé kria Konsellu Kombatente sira Libertasaun Nasional.
Veteranu
sira nasaun nian simu mós apoiu finanseiru Estadu nian, ho valor, iha tinan,
dolares millaun 100 resin.
SAPO
TL ho Lusa
Sem comentários:
Enviar um comentário