Governu timoroan hatoo "laran susar no tristeza"

Governu timoroan hatoo iha loron-segunda ne'e "laran susar no tristeza" ho ex-sekretariu-jeral ONU nian Kofi Annan nian mate, hanoin mós ninian kontributu ba paz no dialógu internasional sira.

"Iha nia vida tomak, Kofi Annan hanesan ema ida ne'ebé empeñadu no determinadu defensor ba paz no ba diálogu internasional, kontribui mós ho ninian asaun hodi hakotu konflitu sira barak ne'ebé ameasa ba paz no seguransa internasional", refere komunikadu ida hosi Governu.

"Memoria Kofi Annan nian sei liga nafatin ho istória Timor-Leste nian tanba serbisu makas ona ba rekoñesimentu internasional direitu ba autodeterminasaun mai ami nian Povu, ba konsulta popular ne'ebé mak determina independénsia ami nian nasaun ne'e, nia lansa baze sira ba konstrusaun atual Estadu Timoroan ne'e", hanoin ezekutivu ne'e.

Kofi Annan maka, antes minutu 00:00 ba loron 20 Maiu 2002, mak entrega formalmente Timor-Leste ba timoroan sira iha serimonia ida ne'ebé maka marka hanesan restaurasaun independénsia nasaun ne'e.

Annan maka superviziona asinatura istóriku akordu loron 05 Maiu 1999 - entre Portugal no Indonezia - ne'ebé maka permite referendu no ne'ebé maka timoroan sira hili atu sai independente.

"Ba Povu Timoroan sira, Kofi Annan nian mate ne'e reprezenta lakon belun ida ne'ebé maka, iha medida ida ne'ebé boot, no ba liberdade no soberania. Ho razaun ida ne'e, memoria Kofi Annan nian sei tau nafatin iha timoroan sira nian fuan", refere komunikadu Governu nian ne'ebé lidera hosi Taur Matan Ruak.

Antigu sekretariu-jeral ONU no premiu Nobel ba Paz tinan 2001 Kofi Annan mate iha loron-sabadu ho tinan 80.

SAPO TL ho Lusa