quinta-feira, 9 de agosto de 2018

PR Hatudu Vontade Solusiona Impase Polítika

PARTILHAR

DILI, (TATOLI) - Eis Prezidente-Repúblika, José Ramos Horta, haktuir atuál Prezidente-Repúblika (PR) nia prinsípiu la’ós atu harii fatuk iha estrada laran ba Governu nia atuasaun, maibé hatudu nia vontade di’ak atu solusiona impase polítika.

“Nu’udar prezidente, nia (Lú Olo) ezije governasaun tenke la’o ho didi’ak no governasaun atu la’o didi’ak tenke haree sé maka tuur iha Governu laran. Prezidente hateten dala barak ona no husu beibeik ona ba Governu atu hanoin fila fali ba elementu sira ne’ebé atu serbí iha Governu,” Horta hato’o kestaun ne’e ba jornalista sira iha Palásiu Prezidente Nicolau Lobato Bairru Pité, Dili, kinta ne’e, hafoin hala’o enkontru ho Prezidente-Repúblika, Francisco Guterres Lú Olo, kona-ba impase polítika.

Horta fiar katak sei hetan solusaun ba problema iha rai laran maibé solusaun ida ne’ebé tenke respeita espíritu konstituisaun, respeita prezidente nia konviksaun rasik nu’udar prezidente-repúblika, respeita Governu nia responsabilidade atu kompleta estrutura Governu ne’e no Governu mós tenke koloka elementu sira tuir kompeténsia.

“Kompara ho elementu balun ne’ebé buka serbisu iha kompañia mídia sira, imposivel diretór kompañia mídia ne’e simu kedas elementu ne’e hodi halo serbisu, maibé tenke liuhusi prosesu ida hatama CV nune’e bele koloka elementu ne’e tuir nia área. Governu mós tenke ezije buat ida ne’e tanba atu serbí povu ho matenek no esperiénsia,” nia kompara.

Nia husu ba lider partidu polítiku sira atu haluha tiha liafuan kro’at ne’ebé soe ba malu iha kampaña eleitorál liu-ba, maibé tuur hamutuk buka solusaun ba rai ida ne’e.

Iha biban ne’e, Premiadu Nobél ba Pás husu ba kada forsa polítika atu di’ak liu lalika fó ultimatu ba malu tanba bainhira fó ultimatu sei aumenta tan konflitu iha nasaun nia laran.
“Kuandu fó ultimatu bainhira ita laiha ona kapasidade atu rezolve problema polítiku ida no hanoin didi’ak kuandu fó ultimatu ba malu tanba keta halo laiha maioria para halo prosesu ruma. Purtantu, lalika. Di’ak liu ko’alia didi’ak ba malu. Xefe-Estadu disponivel loos atu ko’alia ho ema hotu-hotu,” nia fó hanoin.

Jornalista: Xisto Freitas | Editór: Manuel Pinto

Imajen: Eis Prezidente-Repúblika, José Ramos Horta
PARTILHAR

Author: verified_user

Publicação luso-timorense sem fins lucrativos

0 comentários: