Respeitu Ukun Na’in Ida Valoriza Ona Joven Pasadu

DILI, (TATOLI) -  Sekretáriu Estadu Juventude no Desportu (SEJD), Nélio Isaac Sarmento hateten bainhira joven sira respeitu ukun na’in ida valoriza ona joven pasadu ne’ebé fó sira-nia aan, sakrifísiu, hodi luta ba independénsia Timor-Leste (TL).

Lia ne’e Nélio Isaac fó hanoin perante estudante no joven sira iha kampus Universidade Nasionál Timor Lorosa’e (UNTL), Caicoli-Díli, Kuarta lorokra’ik, horseik.

“Respeita de’it ita-nia ukun na’in ida em termos de étika nian mós ita fó valór ba joven sira ne’ebé mak partisipa ativu iha ita-nia prosesu luta nian iha tempu pasadu,” Sekretáriu Estadu Nélio Isaac Sarmento, fó hanoin iha abertura reflesaun ho tema ‘reflete pasadu, fortifika prezente hodi kontribui ba dezenvolvimentu nasionál’, organiza husi DSMTT (Dewan Solidaritas Mahasiswa Timor-Timur) hodi hanoin hikas 30 agostu 1999.

Sekretáriu Estadu Nélio Isaac Sarmento reforsa katak iha tempu agora, kontribuisaun joven nian mak ba dezenvolvimentu liuhusi abilidade iha setór hothotu. “Bainhira ita-nia prestasaun di’ak iha akadémiku, ita fó valór ba susesu ne’ebé mak ita-nia joven sira halo iha tempu pasadu. La’ós de’it iha edukasaun, la’ós de’it iha abilidade akadémiku maibé iha mós setór balun,” hateten sekretáriu estadu ne’e.

Nia hateten katak iha prosesu dezenvolvimentu ida ne’e, ita tenke halo mak kaer ba istória, kaer ba sakrifísiu joven sira uluk nian katak ho movimentu ne’ebé susar iha tempu uluk maibé sira alkansa mehi no objetivu.

Tanba ne’e, tuir Sekretáriu Estadu Nélio Isaac Sarmento, buat ne’ebé ita liliu joven eh foinsa’e sira tenke alkansa mak tenke aprende barak liu, kaer ba istória, atu hetan koñesimentu foun husi oportunidade ne’ebé estadu kria hela iha eskola, iha universidade, iha buat hothotu ne’ebé estadu fó.

“Loos duni, la’ós kompletamente 100% di’ak. Maibé primeiru ita iha kondisaun ne’ebé di’ak kompara ho ita-nia maun sira iha tempu pasadu. Bainhira ita respeitu de’it buat di’ak ida, se ita la’o iha dalan haree ema soe fo’er arbiru ita foti soe ba nia fatin, kontribuisaun pozitivu ida ne’ebé fó valór ba ita-nia rezisténsia,” Sekretáriu Estadu Nélio Isaac Sarmento fó hanoin.

Sekretáriu estadu ne’e hateten tan katak governu iha hanoin atu kria tan oportunidade ba espasu ne’ebé mak di’ak atu sira aprende. La’ós ba joven sira iha universidade de’it maibé joven sira ne’ebé hakotu eskola, joven sira ne’ebé la iha atensaun.

“Ita kria kondisaun ida atu sira bele iha koñesimentu natoon; la’ós hanesan joven sira iha universidade maibé pelumenus sira bele iha hanoin katak saida mak sira bele halo ba estadu, liliu iha ukun aan. Tanba ne’e, ha’u dehan katak se ita respeita de’it sinál tranzitu ida mós ita fó ona kontribuisaun. Ki’ik maibé iha signifikadu boot ba ita-nia rain,” nia fó hanoin tan.

Sekretáriu Estadu Nélio Isaac Sarmento mós konsidera katak joven sira iha tempu pasadu sakrifika sira-nia vontade hotu, iha prosesu ameasa nia laran, sira bele fó rezultadu di’ak ida iha ita-nia objetivu ukun aan nian. Ho difikuldade sira bele ultrapasa mehi no objetivu ida.

Joven sira uluk la’o iha difikuldade nia laran, até balun la hetan nível edukasaun ida di’ak. Nune’e nia dezafia joven atuál. “Mehi boot liu iha ukun rasik aan mak ita atu kontribui ba bem estar povu nian tomak. Evita hahalok korupsaun ida, fó valór ba kontribuisaun ba ita-nia joven sira halo iha tempu pasadu,” nia dehan.

Sekretáriu Estadu Nélio Isaac Sarmento mós friza dala ida tan perante joven universitáriu katak kaer ba sakrifísiu ne’ebé joven sira uluk luta to’o ita hetan liberdade hodi kontribui. “Kontribui ho maneira seluk hanesan fó aan atu estuda, fó aan atu kuidadu estadu ne’e, fó aan atu partisipa iha prosesu hothotu, iha dezenvolvimentu nasionál. Ita ativu iha eskola to’o finaliza ita-nia grau, ne’e mós ita-nia partisipasaun,” nia fó hanoin.

Nia rekoñese katak realidade agora ita seidauk iha empregu barak maibé ita tenke esforsu nafatin hodi kontribui, bele ki’ik maibé iha signifikadu. “Signifikadu bele ki’ik maibé ho oituan, oituan ita sei bele hetan buat ne’ebé boot,” nia enkoraja.

Entretantu, iha reflesaun ne’e, SEJD lori governu nia naran hato’o mós agredesimentu ba buat ne’ebé DSMTT halo ona hodi kontribui ba prosesu libertasaun nasionál.

Reflesaun ne’ebé halo iha eis UNTIM (Universitas Timor-Timur) nia refletór sira mak profesór Antero Benedito, Prezidente Komite Orientadór 25, Constâncio Pinto, Komite 12 Novembru reprezenta Gregório Saldanha, inklui profesór Armindo Maia, profesór Francisco Miguel Martins no Padre Francisco Barreto.

Partisipa iha reflesaun ne’e, alende estudante universitáriu no joven sira, inklui mós membru DSMTT no seluk tan.

Jornalista: Rafy Belo | Editór: Manuel Pinto

Imajen: Sekretáriu Estadu Juventude no Desportu (SEJD), Nélio Isaac Sarmento