DILI, (TATOLI) – Xefe
Bankada Frente Revolusionária Timor-Leste Independente (FRETILIN), Aniceto
Guterres, hateten Bankada Fretilin sei kontinua esforsu tomak atu asegura lei
no prosesu hotu-hotu ne’ebé bele garante boa governasaun.
“Boa governasaun presiza lei
anti-korupsaun ida forte no efetiva. Ita presiza aprova lei anti-korupsaun ida
ne’e ho efetiva, atu evita ezbanjamentu ba Estadu nia rekursu finanseiru
hotu-hotu no hametin koezaun sosiál”, intervensaun iha abertura dahuluk ba
sesaun kinta lejislativa Parlamentu Nasionál (PN), iha plenária, ohin.
Nia hatutan Bankada FRETILIN
hakarak orgaun fiskalizadora ne’e hametin liu tan kna’ar ho rigór atu
fiskaliza, implementasaun ba programa governu nian, tuir duni lei no serve duni
povu no Estadu nia interese, tanba povu ho Estadu merese hetan polítika ida ho
kualidade.
Nia mós dehan pasu ida atu
alkansa tarefa ne’e mak bankada FRETILIN hahú ona halo inkéritu parlamentár ho
ninia aliadu sira, ne’ebé iha rekerimentu ne’e eziji PN atu estabelese komisaun
inkéritu ida atu revee fali prosesu balu ne’ebé rezulta iha ajudikasaun direta
ba projetu 142.
“Inkeritu ida ne’e sei ajuda
Estadu atu revee filafali, no hadi’a ita nia prosesu aprovizionamentu, atu
hametin sistema ida transparente no justu liu tan”, katak.
Nune’e mós nia dehan tan, hamutuk
ho Inkéritu Parlamentár ida ne’e, Bankada FRETILIN mós sei kontinua ninia apoiu
ba auditoria ba instituisaun Estadu hotu-hotu, inklui iha ZEESM, polítika
ne’ebé VII Governu Konstitusionál hahú no espera katak VIII Governu
Konstitusionál sei kontinua.
“FRETILIN mós preokupa maka’as ho
kestaun dívida Estadu nian. Ita presiza hakotu prátika dívida tomak, ne’ebé
deskontroladu no sei kontinua tau matan ba ida ne’e”, katak.
Entretantu, Bankada Fretilin
submete ona inkéritu parlamentár ba projetu 142, iha loron aprovasaun finál no
globál Proposta Lei Orsamentu Jerál Estadu (OJE) 2018 iha PN.
Aprezentasaun rekerimentu ne’e
husi Xefe Bankada Fretilin, liuhosi ninia intervensaun.
Jornalista: Julia Chatarina | Editora:
Rita Almeida
Imajen: Xefe Bankada FRETILIN,
Aniceto Guterres. Foto Antonio Goncalves
Sem comentários:
Enviar um comentário