Falur Nunka Imajina Sai Vise Xefe Estadu Maior Jenerál

DILI, (TATOLI) – Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Domingos Raul Falur Rate Laek, hateten nunka imajina sai Vise Xefe Estadu Maior Jenerál F-FDTL.

“Satán ema hanesan ami sira ne’e iha ami nia jornada tomak moris iha tensaun no nervu, tan ne’e ami nunka imajina dehan atu mai hetan pozisaun sira hanesan ne’e, ne’ebé la’ós fásil”, Falur ba jornalista sira liuhusi konferénsia ba imprensa iha Palásiu Prezidente Nicolau Lobato, Bairru Pité, segunda ne’e, hafoin toma pose.

Nia dehan ninia sentimentu ne’e normál maibé tuir kultura, sentimentu ne’e haksolok no tristeza.

“Sentimentu haksolok ho triste ne’e kultura Timor nian. Ema kuandu hetan buat foun ka esperiénsia foun, normalmente hetan sentimentu triste no haksolok”, jenerál fitun ida ne’e afirma.

Tuir Falur vizaun Xefe Estadu Maior ne’e ema ida halo parte instituisaun ida ne’ebé difini ona iha Konstituisaun no Lei Defeza Nasionál  to’o iha estatutu sira. Katak, hakarak forsa ida ne’ebé sai hanesan kredível, kapa’as, operasionál no disponível para hala’o misaun iha kualker momentu.

Falur Rate Laek indijita hosi Primeiru-Ministru, Taur Matan Ruak, hafoin instituisaun F-FDTL aprezenta naran rua ba Governu maka hanesan Brigadeiru Jenerál Sabica Besi Kulit no Falur Rate Laek rasik.

Jornalista: Xisto Freitas | Editora: Rita Almeida

Imajen: Vise Xefe Estadu Maior Jenerál F-FDTL, Falur Rate Laek, kaer Prezidente Repúblika, Francisco Guterres Lú Olo, nia liman iha serimonia toma posse ne’ebé hala’o iha Palásiu Prezidensiál, segunda (1/10/2018). Imajen António Goncalves