Polisia Hetan Ataka iha Komoro, Ida Kanek

DILI: Membru Polisia Nasionál Timor Leste (PNTL) Eskuadra Dom Aleixo, Komoro, hetan ataka husi grupu balun iha area ponte Komoro III. Iha akontesimentu iha Domingu (25/11) maizumenus tuku 17.45 ne’e, membru polisia ida hetan kanek.

Tuir informasaun husi Komando PNTL, kazu ne’ebé rezulta membru PNTL ne’ebé identifika ho naran Antonio Carmona, kanek iha ulun, hafoin hetan orden hodi halo atuasaun ba kazu konfrontu ne’ebé mosu iha area Ponte Komoro III. Informasaun konfrontu entre grupu rua ne’e polisia simu husi komunidade sira.

Bainhira to’o iha fatin, iha duni konfrontu, maibé grupu ne’ebé envolve iha konfrontu la koopera no ikus mai halo fali asaun hasoru polisia sira. “Sira fila halo kedas ataka hasoru ami-nia membrus. Sira tuda ami-nia membrus ho fatuk no rezulta ami-nia membrus, Ajente Prinsipal ida mak hetan kanek iha ninia ulun-fatuk parte karuk,” informa Komandante Jeral PNTL, Komisariu Julio da Costa Hornai, ba jornalista sira iha nia gabinete, Kaikoli, Segunda (26/11).

Nu’udar Komandante Jeral PNTL, Komisariu Julio dehan nia la kontente ho hahalok ne’e, tanba polisia nudar autoridade seguransa atu atende públiku.

Komisariu Julio husu ba komunidade sira, liu-liu ba joven sira, atu labele uza situsaun ho kazu Kuluhun nian hodi halo fali problema hasoru polisia.

Tanba, nia dehan, akontesimentu iha Kuluhun ne’e erru individu, no Komando foti ona medidas hasoru membru sira ne’e.

“Ha’u-nia membru na’in rua ne’ebé komete iha kazu (Kuluhun) ne’e iha ona prizaun preventiva no na’in rua seluk ne’ebé la envolve mós hetan TIR,” deklara nia.

Tan ne’e, Komisariu husu ba komunidade tomak iha teritoriu TL atu kontinua koopera ho polisia hodi bele lori situasaun hakmatek.

Maske nia membru sira hetan tuda, Komisariu Julio hatutan, polisia sei la hakiduk.

“Ha’u orienta ona buka tuir sira to’o lori mai komando atu sira bele reponsabiliza aktus ne’ebé sira halo. Tanba polisia nu’udar ajente seguransa estadu nian,” katak nia.

Entretantu, iha Segunda (26/11) maizumenus tuku 09.30, Komisariu Julio vizita opsital Nasionál Guido Valadares hodi haree kondisaun ajente ne’ebé hetan tiru, maibé bainhira to’o iha ne’ebá la konsege hasoru tanba ajente ne’e fila ona ba uma.

Apresia Joven Kuluhun

Entretantu, Komandante Jeral Polisia Nasional Timor Leste (PNTL), Komisariu Julio da Costa Hornai, apresia komunidade, liu-liu joven Kuluhun, ne’ebé hakmatek maske lakon sira-nia kolega na’in tolu.

Tuir Komisariu Julio, buat ne’ebé joven Kuluhun hatudu sai ezemplu di’ak ba joven sira iha bairu sira seluk atu bele halo tuir.

“Ezemplu di’ak mak joven Kuluhun sira hatudu ona. Maske sira lakon sira-nia ema, husi inisiu akontesementu to’o agora, sira hatudu kooperasaun di’ak ho polisia. Ida ne’e mak joven sira seluk tenke la’o tuir dalan ne’e,” deklara Komisariu Julio.

Tomé Amado | Independente