Timoroan Hotu Tenke Prontu Luta Hasoru Korupsaun

DILI, (TATOLI) – Timoroan hotu tenke prontu atu luta kombate korupsaun hodi aselera prosesu desenvolvimentu nasionál ba moris di’ak povu nian.

Diretór Ezekutivu Organizasaun Sentru Estudu ba Dame no Dezenvolvimentu (CEPAD-sigla portugés), João Boavida, hato’o mensajen ne’e durante komemorasaun loron mundiál anti korupsaun ho tema funu hasoru ita án hosi hahalok a’at korupsaun iha ótel Timor, ohin ne’ebé tuir loloos selebra iha loron 9 dezembru 2018.

“Ita sira ne’ebé hamrik hasoru má governasaun, má jestaun, tranferénsia la’ek, pobreza, korupsaun, ita hatene katak servisu iha ambiente iha lei progresivu hanesan lei anti korupsaun, lei protesaun ba sasin, karik iha, se laiha ita servisu iha ambiente ida susar”, katak nia.

Tuir nia atu kombate hahalok korupsaun la’ós fasil kuandu la hetan apoiu morál hosi servidór Estadu no ema hotu.

“Kuandu ita hamrik hasoru korupsaun, la’ós oposizaun ba governu maibe ita hamutuk ho governu atu hadi’a futuru rai ida nian”, afirma tan.

katak tan, servidór públiku tenke iha dever morál no integridade hodi apoiu prevensaun ba korupsaun hodi fó tratamentu ho dignu ba povu.

“Aimoruk di’ak liu ba prenvensaun korupsaun maka ami servidór públiku sira tenke konsiente katak dignidade umana ne’e importante”, realsa.

Sidadaun hotu tenke brani luta hasoru hahalok ne’e, tanba Prezidente Repúblika no Primeiru-Ministru mós deklara ona kombate korupsaun, tanba povu maioria sei moris iha kiak.

Alende ne’e, Komisáriu Komisaun Funsaun Públika (KFP) ba asuntu disiplinár, António Freitas, akresenta integridade lideransa no funsionáriu públiku iha ámbitu funsaun públika importante atu oinsá prevene korupsaun bainhira foti desizaun.

“Iha ámbitu funsaun públika, integridade lideransa no funsionáriu públiku, liuliu sira ne’ebé iha ligasaun bele kria korupsaun hanesan aprovizionamentu, finansa. Kondisaun hirak ne’e fasíl atu halo kontratu tanba ne’e presiza atu fó atensaun”, katak tan.

Lei estatutu funsaun públika númeru 5/2009 no kode étika hateten funsionáriu públiku tenke asegura integridade profesionál ba atendementu públiku.

“Iha fatin ida ne’e funsaun públika nakloke tomak ba sosiedade hotu bainhira ami nia diretór, kargu xefia ka funsiónariu ne’ebé komete iha kondisaun hanesan ne’e, komisaun nakloke hodi simu keixa”, realsa.

Hahú 2009 to’o agora KFP rejista kazu indisiplinár hamutuk 1259 hosi númeru ne’e porsentu 30 indikasaun ba korupsaun.

“Zero toleránsia ba diretór, xefe departementu no funsiónariu kongkalikong hodi halo Estadu hanesan fatin hadi’a sira nia kondisaun tomak”, alerta tan.

KFP sei reforsa servisu ho instituisaun sosiedade sivíl no instituisaun públiku hanesan Komisaun Anti Korupsaun (KAK), Ministériu Públiku (MP), Provedoria Direitu Umanu no Justisa (PDHJ-sigla portugés), no seluk tan hodi promove governasaun di’ak iha instituisaun Estadu hodi prevene korupsaun.

Komemorasaun tinan ne’e, CEPAD servisu hamutuk ho Ministériu Agrikultura Peska, Ministériu Obras Públikas, Ministériu Finansa, Ministériu Saúde, Ministériu Edukasaun Juventude no Desportu, Ministériu Solidaridade Sosiál no inkluzaun, Ministériu Administrasaun Estatal hamutuk ho instituisaun públiku KAK, KFP, Institutu Nasionál Administrasaun Públika (INAP), Organizasaun Mundiál Parlamentár Kontra Korupsaun (GOPAC-sigla inglés), PDHJ, Prokuradoria Jerál Repúblika (PJR), Institutu Jestaun Ekipamentu (IJE) no seluk tan.

Jornalista: Agapito dos Santos | Editora: Rita Almeida

Imajen: Imajen Ilustrasaun hosi google.

TATOLI - artigu ne ' ebé uluk: Nasaun Tolu Partisipa Akampamentu PERMATIL iha Timor-Leste