Tinan Ne’e Reseita APORTIL Bele Atinje Milliaun $4

DILI, (TATOLI) – Autoridade Portuária Timor-Leste (APORTIL) rekolla ona reseita husi janeiru to’o outubru hamutuk milliaun $3 resin nune’e iha espetativa bele atinje to’o milliaun $4 iha tinan ne’e.

Prezidente APORTIL, Constantino Soares, hatete kompara iha tinan kotuk no agora rendimentu ne’ebé hetan laiha diferensa, tanba iha 2017 ne’e autoridade simu reseita milliaun $3 resin, nune’e previzaun ba tinan ne’e milliaun $4 maka laiha diferensa ne’ebé signifikativa.

“Ida ne’e estimativa de’it, bele liu, bele lato’o”, prezidente afirma iha Parlamentu Nasionál, ohin.

Prezidente hatutan previzaun APORTIL nian kona-ba rendimentu iha 2019 kontinua ho milliaun $3, mas nia bele ultrapasa ou lato’o tanba kondisaun ekonomia rai-laran flutuativa (namlele) lahalimar.

“Fundu reseita ne’e iha oin lima, ida maka ró, ida maka sasán sira tama-sai, ida maka operasaun Berlin Nakroma, ida seluk maka kobransa enerjia elétrika ho fornesimentu água ne’ebé maka fó kobransa ba montante ne’e”, nia informa.

Constantino dehan entre iten lima ne’e ida ne’ebé maka fó kobransa maka’as mak husi ró sira ne’ebé normalmente lori merkadoria kontentór ne’ebé liu 100, ne’ebé nia ekivalénsia ba pagamentu ne’e boot.

Sobre hasa’e taxa APORTIL mós iha ona planu atu halo alterasaun ba dekretu lei númeru 19/2003 atu diversifika nia reseita portuária.

“Tanba iha dekretu lei númeru 19, iha reseita barak seidauk kobra, ne’ebé ami komesa ona nia alterasaun atu haree to’ok fonte ne’ebé maka poténsia atu ami bele kobra. Dekretu lei ne’e ami prepara ona, sei submete ba Konsellu Ministru atu hetan aprovasaun, depois ami implementa maizumenus meia-du 2019 ami-nia reseita bele aumenta tan tanba intensaun atu diversifika tan reseita portuária nian”.

Jornalista: Maria Auxiliadora | Editora: Rita Almeida

Imajen: Portu Dili. Foto espesiál.