Xefe Estadu Hato’o Kondolénsia Ba Família Matebian Kazu Kuluhun

DILI, (TATOLI) - Prezidente Repúblika, Francisco Guterres Lú Olo, ofisialmente hato’o sentidu kondolénsia profunda ba família tomak ne’ebé lakon sira-nia oan-doben iha Masakre Kuluhun de Baixo, domingu (18/11) dadér.

“Ha’u bele sente saida mak imi sente agora. Imi-nia laran susar, sai mós ha’u-nia laran-susar. Ita hotu sente laran-moras tebe-tebes bainhira lakon ita-nia ema hanesan ne’e,” Xefe Estadu dehan liuhusi konferénsia ba imprensa iha Palásiu Prezidente Nicolau Lobato, Bairru Pité, tersa ne’e.

Nu’udar Prezidente Repúblika, Lú Olo afirma, tristeza boot ida ba nia bainhira simu informasaun iha domingu dadersan no iha lorron ne’e kedas (18 novembru) nia haruka Xefe Kaza Militár Prezidénsia Repúblika to’o kedas iha fatin akontesementu hodi solidariza família matebian no buka hatene kronolójia hosi akontesementu.

“Ita hotu la hein katak iha Nasaun Timor-Leste independente, ne’ebé harii liuhusi luta naruk, tanba hakribi violénsia, Estadu nia ema uza fali kilat hodi oho ita-nia Povu. Prezidente Repúblika kontra atitude membru PNTL ne’ebé uza kilat hodi hasai joven inosente na’in tolu nia vida no hakanek joven na’in lima,” nia hateten.

Polísia Nasionál Timor-Leste, tuir nia, nu’udar instituisaun Estadu ne’ebé tau matan ba seguransa Nasaun, tenke hatuur ás Lei no Órden Públika no husu atu halo investigasaun kle’an kona-ba akontesimentu ne’e no prosesa lalais autór sira ba Tribunál atu foti desizaun.

“Membru Polísia labele uza kilat tuir sira-nia hakarak maibé tuir lei no regras polísia nian. Membru Polísia tenke hatene sira-nia responsabilidade bainhira hala’o sira-nia serbisu nu’udar ajente ho kilat,” Lú Olo tenik.

Maske nune’e, Prezidente Repúblika apela ba povu tomak atu fó konfiansa nafatin ba Polísia Nasionál Timor-Leste (PNTL) hanesan instituisaun Estadu ne’ebé serbisu ba manuntensaun Lei no Ordem públika, tanba membru sira ne’ebé halo atuasaun ne’e individuál, la’ós PNTL nu’udar instituisaun.

Jornalista: Xisto Freitas | Editór: Manuel Pinto

Imajen: Prezidente Repúblika, Francisco Guterres Lú Olo. Imajen Mídia PR