DILI, (TATOLI) – Vise Xefe
Komisaun C ne’ebé trata asuntu Negósiu Estranjeiru, Defeza no Seguransa iha
Parlamentu Nasionál (PN), David Dias Ximenes Mandati, hateten Polísia Nasionál
Timor-Leste (PNTL) tenke halo seguransa ho rotativa durante oras 24 nia laran,
nune’e bele asegura estabilidade rai-laran.
“Polísia sira labele mantein iha
fatin de’it, sira tenke nafatin iha povu nia leet durante oras 24 nia laran,
tenke servisu ho rotativamente atu bele garante profesionalizmu seguransa nian
hodi bele garante trankuilidade ba povu tomak”, deputadu hosi bankada opozisaun
Frente Revolusionária Timor-Leste Independente (FRETILIN) ba jornalista sira
iha sala komisan PN, ohin.
Mandati tau iha kestaun maka
dadaun ne’e seguransa seidauk másimu. Tanba ne’e, polísia tenke garante ordem hodi
fó seguransa, proteje sidadaun no bens, prevene kriminalidade no kontribui hodi
asegura normalidade funsionamentu instituisaun demokrátika.
Ordem públika, ordem sosiál ho
ordem jurídika. Ordem públika kuandu la’o di’ak, ordem jurídika mós la’o,
kuandu ordem jurídika la iha, ordem públika la iha kritériu, afirma.
Nune’e, nia akresenta polísia
tenke garante duni ordem ho lei, lei ne’e ema tenke respeita, kuandu ema la
respeita, polísia mosu, maibé polísia tenke halo asaun preventiva no asaun
represiva.
Enkuantu, garante estabilidade ho
objetivu oinsá povu bele moris hakmatek, ko’alia lei ho ordem, lei iha ona,
entaun povu moris tuir lei, se lakohi tuir lei mak polísia nia servisu atu
hala’o prevensaun, vizibilidade polísia nian iha fatin hotu atu fó seguransa no
garante seguransa ba povu tomak, katak tan.
Kuandu polísia nia prezensa iha
fatin hotu, nia dehan povu mós iha tendénsia atu envolve iha seguransa, karik
iha sinál índisiu ne’ebé ema atu halo krime, povu sei antesipa hodi informa ba
polísia no sei prevene hodi labele hamosu kriminalidade.
Jornalista: Zezito Silva | Editora:
Rita Almeida
Foto Espesiál
Sem comentários:
Enviar um comentário