DILI, (TATOLI) – Estudante
na’in 20 hosi Universidade Orientál Timor Lorosa’e (UNITAL), Fakuldade
Siénsia Sosiál no Polítika (SISPOL) promove ambiente saudável, seguru no moos
ho limpeza jerál.
“Organiza ami-nia maluk estudante
husi komunikasaun sosiál, ami tuun halo limpeza jerál iha fakuldade nia oin,
nune’e ita-nia ambiente ne’e moos, prevene moras ne’ebé da’et husi fo’er sira”,
katak Prezidente Komisaun Organizadora, Inocêncio Boavida Guterres, iha Kampus
UNITAL, dalan Liberdade Imprensa Bekora, sábadu (1/12).
Impaktu fo’er ba ambiente mak
saúde nomós ekonomia sosiál. Katak, lixu ba ambiente hafo’er bee-matan ka bee
moos sira iha mota nomós hamosu poluisaun no provoka anin ka oxijéniu la
fresku.
Impaktu lixu ba saúde mak bele
hamosu diarea, kolera, tifus, isin-katar no hamosu lalar barak no bele hada’et
ema liuhusi hahan ne’ebé mak konsume lorloron.
Impaktu ba ekonomia sosiál mak
bainhira lixu la jere ho di’ak bele provoka saúde públiku no sei iha tendénsia
ba aumentu gastu ba promosaun saúde, hola ai-moruk no seluk tan. Inklui,
esbanjamentu finansa estadu ba reparasaun lixeiru no infrastrutura públiku
balun tanba kauza husi lixu ne’ebé mak soe arbiru.
Estudante semester neen ne’e mós
apela ba públiku, inkluzivamente estudante katak tenke kuidadu ambiente ho maneira
tau lixu tuir nia fatin ka labele lekar fo’er sira namkari.
“Ita konserva hamutuk lixu sira;
tau hamutuk iha nia fatin, atu nune’e ita-nia ambiente furak nafatin,” husu
Prezidente Komisaun Organizadora, Inocêncio Boavida Guterres.
Iha fatin hanesan, estudante
Agostinha Bosco dos Santos, perante jornalista sira hateten nu’udar estudante
tenke prevene ambiente moos.
“Ne’e la’ós buat foun ba ita,
maibé ita tenke loke dalan ba estudante seluk atu kuidadu di’ak liután ita-nia
ambiente”, dehan estudante ne’e.
Nia mós sujere ba estudante sira
seluk, la’ós komunikasaun sosiál de’it maibé husi área hotu tenke kuidadu
ambiente. “Ambiente ne’e importante tebes ba ita-nia saúde”.
Gilberto Cabral de Araújo,
estudante ida mós iha marjen atividade limpeza ne’e akresenta hakarak ambiente
ne’ebé seguru no saudável iha kampus.
Nune’e mós rekomenda ba estudante
sira hotu katak karik iha fo’er; lata mamuk, kaixa ka plástiku mamuk, tenke tau
iha lixu fatin sira ne’ebé mak preparadu ona iha kampus.
“Fo’er tenke tau iha nia fatin.
Labele soe namkari iha klase laran ka iha li’ur. Tanba ne’e hakarak rekomenda
ba maluk estudante sira labele soe fo’er nafatin nune’e tanba fo’er ne’e bele
fó impaktu ba ita-nia saúde, bele lori moras mai ita”, rekomenda estudante
Gilberto Cabral, hodi sujere mós ba universidade prepara fatin ne’ebé dignu
hodi estudante sira soe lixu ba tanba balun estraga ona.
Jornalista: Rafy Belo | Editora:
Rita Almeida
Imajen: Ilustrasaun
Sem comentários:
Enviar um comentário