Remíxio no Lequidoe Seidauk Asesu Informasaun

AILEU, (TATOLI) – Administradór Munisípiu Aileu, João Tilman do Rego, preokupa ho prezensa mídia públiku hanesan Rádiu no Televizaun Timor-Leste (RTTL-EP) tanba menus halo kobertura iha munisípiu ne’e, inklui preokupa Postu Administrativu Remixio no Lequidoe seidauk asesu informasaun husi Rádiu Komunidade Rai-Husar, Aileu (FM 97,1 Mhz) tanba kestaun tékniku nomós subsídiu ba jornalista rádiu komunidade.

Preokupasaun ne’e hato’o bainhira iha biban hasoru malu ho Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, iha edifísiu Administrasaun Munisípiu Aileu, kinta (29/11).

Hatan ba preokupasaun ne’e, governante ne’e akresenta sei konsidera ideia no preokupasaun sira ne’e.

“Mai atualiza ita-boot sira-nia (jornalista rádiu komunidade-red) realidade iha ne’e, ha’u mai mós ho diretór rádiu komunidade mós ho asesór sira husi SEKOMS, mídia sira, ami sei konsidera ideia, preokupasaun balun mak iha i ami haree rasik kondisaun infrastrutura, liliu ohin informa mós kona-ba transmiter ne’ebé mak sei limitadu, tanba ne’e mak rádiu komunidade seidauk ba fatin hotu; Remíxio no Lequidoe”, hateten Merício Akara ba jornalista sira.

Sekretáriu Estadu Komunikasaun Sosiál mós haktuir iha biban hanesan, perante mídia sira katak buat pozitivu ne’ebé atualiza durante iha rádiu ho lema: Tatoli Husi Neon Ba Neon, mak rádiu ne’e mós iha relasaun di’ak ho jornalista RTTL. Ep destakadu iha munisípiu ne’e.

“Aban bainrua ita haree to’ok, jornalista Ajénsia TATOLI nian iha, se bele parte tolu ne’e kolabora malu; ida la iha, ida seluk kompleta. Orsamentu mai husi estadu, entaun parte tolu ne’e, se bele aban bainrua kontinua”, dehan sekretáriu estadu iha okaziaun vizita estúdiu Rádiu Komunidade Rai-Husar Aileu, FM 97,1 Mhz.

Enkuantu kona-ba apoiu insentiva ne’ebé mak SEKOMS fó durante ne’e, sei mantein no kontinua apoia.

“Iha difikuldade balun ita sei hadi’a. Ha’u ko’alia tiha ona ho diretór (Luís Evaristo dos Santos Soares-red) para tinan oin ne’e, fallansu ruma ka difikuldade ruma mak iha, ne’e tenke jere para hadi’a di’ak liután”.

Entretantu antes ne’e, SEKOMS mós hala’o ona vizita ba Rádiu Komunidade iha Munisípiu Ermera, Manatutu no depois Rádiu Komunidade Mauloko Maubise (FM 89,7 Mhz) hodi rona preokupasaun, observa kondisaun infrastrutura, téknika nomós seluk tan no sei kontinua ho rádiu seluk hodi bele tau mós konsiderasaun.

Konsiderasaun sira ne’e iha tanba governu da-ualu konstitusionál, lidera husi Primeiru-ministru, Taur Matan Ruak, mós deskreve iha nia planu eh programa sira, durante mandatu. Katak apoia no reforsa Ajénsia Notísia Timor-Leste nian, TATOLI. Apoiu no reforsa Konsellu Imprensa, nu’udar orgaun independente reguladór ba setór komunikasaun sosiál.

Kontinua apoiu programa diseminasaun kona-ba asaun governativa, hodi promove koñesimentu públiku nian ba asaun governativa ho transparénsia ne’ebé boot liu kona-ba governasaun.

Kontinua apoiu RTTL, E.P, inklui hadi’a infrastrutura fízika ho atualizasaun ekipamentu tékniku nomós iha implementasaun planu estratéjiku ida ba imprensa, atu nune’e bele hadi’a kualidade ho kuantidade informasaun ne’ebé divulga.

Propoin ba Parlamentu Nasionál atu aprova lejislasaun hodi regula setór komunikasaun audiovizuál (rádiudifuzaun/lei) iha Timor-Leste.

Estabelese institutu ba formasaun jornalista no kontinua aposta iha formasaun jornalista ba dezenvolvimentu no diversifikasaun setór ida ne’e.

Dezenvolve mekanizmu kooperasaun intersetoriál ne’ebé bele poténsia (ka optimiza) uzu língua ofisiál koretu husi jornalista sira.

Dezenvolve mekanizmu ba kooperasaun intersetoriál hodi fomenta no divulga lian ofisiál ba populasaun tomak.

Apoiu Konsellu Rádiu Komunitáriu no estabelesimentu rádiu komunitáriu foun. Apoia asosiasaun jornalista nasionál sira. Insentiva asesu no promove partisipasaun feto iha orgaun komunikasaun sosiál.

Inkrementa ka dezenvolve perspetiva kona-ba jéneru iha órgaun komunikasaun sosiál no insentiva kampaña no programa ne’ebé bele promove lian ofisiál sira, identidade nasionál, edukasaun ba sidadania, kna’ar feto nian iha sosiedade no koñesimentu tékniku no sientífiku. Inklui, promove diversifikasaun órgaun komunikasaun sosiál nomós iha nível munisipál.

Jornalista: Rafy Belo | Editora: Rita Almeida

Imajen: Sekretáriu Estadu Komunikasaun Sosiál, Merício Juvinal dos Reis “Akara” entrevista ho jornalista sira. Foto TATOLI: Egas Cristovão