domingo, 21 de abril de 2019

Ajénsia Intelejénsia Estadu iha Tolu


DILI, (TATOLI) – Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek, esplika Ajénsia Intelejénsia Estadu (AIE) ne’ebé ofisiál no legalizadu maka Servisu Nasionál Intelejénsia (SNI), Servisu Informasaun Polisiál (SIK) no Servisu Informasaun Militár (SIM).

Falur esplika ajénsia sira ne’e Estadu harii atu serbí povu nia seguransa di’ak, serbisu ba dezenvolvimentu nasaun ida nian no serbisu atu konsolida instituisaun Estadu sai metin.

Tuir Falur númeru membru ajénsia intelejénsia seidauk sufisiente no presiza aumenta tan númeru iha futuru, tanba nasaun kuandu dezenvolvidu ona ne’e problema mós sei aumenta barak.

“Dezenvolvimentu teknolojia, sosiál no nasionál kuandu avansu, ita presiza aumenta númeru membru ajénsia maibé la’ós atu hamenus fali”, nia dehan ba jornalista sira iha Palásiu Prezidente Nicolau Lobato, Bairru Pité, Kuarta (17/4), relasiona ho públiku seidauk hatene ajénsia intelejénsia ne’ebé pertense ba Estadu.

Nia rekoñese dalaruma membru ajénsia sira ne’e halo kompetisaun fali iha terrenu tanba sira seidauk interioriza ida-idak nia misaun iha lei.

“Se fose sira hatene didi’ak espíritu lei ne’ebé regula sira ka orientasaun diretiva ne’ebé sira nia komandu rasik fó ba sira hodi interioriza nia konteúdu karik, sira la soke malu iha terrenu, tanba sira ne’e orgaun ka entidade ne’ebé atu kompleta malu. La’ós ba hadau malu ka kompete malu iha terrenu para dehan parte A maka serbisu liu ka parte B maka serbisu di’ak liu”, realsa.

Eis lider rezisténsia ne’e husu ba membru ajénsia intelejénsia atu labele preokupa ba meiu serbisu ne’ebé sei limitadu hela, tanba nasaun ho otas labarik la sees hosi difikuldade.

“Ita agora ne’e moris iha nasaun ida ne’ebé dezenvolvimentu ekonómiku no dezenvolvimentu teknolójiku nia laran no nasaun nia otas sei labarik. Tanba ne’e, lalika ba duni ema nia produtu tinan atus ba atus ne’e. Ita uza buat ne’ebé ohin loron iha para halo serbisu. Ne’e maka ema dehan profisionál”, katak tan.

Jornalista: Xisto Freitas | Editora: Rita Almeida

Imajen: Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek. Imajen Egas Cristovão

Sem comentários: