domingo, 21 de abril de 2019

F-FDTL iha Problema Lojístiku


DILI, (TATOLI) - Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Brigadeiru Jenerál Domingos Raul “Falur Rate Laek”, hateten, lojístika iha instituisaun F-FDTL problema kompleksu no krítiku liu.

Ezemplu ki’ik ne’ebé Brigadeiru Jenerál Falur Rate Laek, aprezenta  mak susar halo manutensaun ba meiu navál sira tanba hasoru difikuldade ba orsamentu no mós transporte operasionál  tuan ona nune’e susar tebes atu halo manutensaun.

Falur Rate Laek afirma katak, kuandu problema ne’e la rezolve sei difikulta ba operasaun F-FDTL no situasaun emerjénsia ruma maka meiu la efisiente bele hamosu problema.

Atu solusiona problema n’e, Falur Rate Laek, dehan, iha sistema planu anuál nia laran no tékniku sira sei hatama planu konkretu para halo manutensaun.

“Governu ida ne’e agora esforsa hela atu rezolve tanba Ministériu Defeza iha atu tau matan ba problema refere”, hateten Falur Rate Laek, ba jornalista sira iha Palásiu Prezidente Nicolau Lobato, Bairru Pité, Kuarta (17/4/2019).

Maske enfrenta difikuldade lojistiku, tuir Falur Rate Laek, membru F-FDTL hotu kontinua halo esforsu atu kumpre servisu no orientasaun hodi asegura estabilidade nasionál.

“Seguransa ne’e Polísia Nasionál Timor-Leste (PNTL) nian, maibé iha tempu ne’ebé de’it maka PNTL solisita, ami koopera. Aleinde ne’e, kuandu iha diretiva polítika hosi governu atu halo serbisu ho PNTL, ami prontu”, afirma Falur Rate Laek.

Jornalista: Xisto Freitas | Editór: Francisco Simões

Imajen: Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek. Imajen Egas Cristovão

Sem comentários: